Ózbekstan prezıdenti qyzynyń páterine tintý júrgizilip, dostary tutqyndaldy
ASTANA. QazAqparat - Tashkentte Ózbekstan prezıdentiniń úlken qyzy Gúlnar Karımovanyń páterine tintý júrgizildi, dep habarlaıdy Ýtro.rý.
Bul sharany prezıdent Islam Karımovtyń qaýipsizdik qyzmetiniń basshysy, general Mýıdjon Tohırıı basqardy, deıdi Karımovamen tanys jýrnalıske silteme jasaǵan Russia Today.
Russia Today aqparaty boıynsha, basyp alý toby ǵımarat tóbesinen Karımovanyń jetinshi qabatta ornalasqan páteriniń balkonyna túsip, úıge basyp kirgen. Onda prezıdenttiń qyzynan basqa taǵy birneshe adam, sonyń ishinde balalar da bolǵan. Páterde tintý júrgizilip, onda bolǵan adamdardyń uıaly telefondary men kompıýterleri tárkilendi. Úsh adam ustaldy. Arnaıy is-shara kezinde Karımovanyń kishi qyzy ózin nashar sezinip, keıin ony anasymen birge aýrýhanaǵa jetkizgen.
Bas prokýratýraǵa úsh adam jetkizildi. Olar - Rýstam Mahmýdov (Karımovanyń azamattyq kúıeýi), Gaıane Avakıan jáne Ekaterına Klıýeva. Vedomstvonyń saıtynda habarlanǵandaı, bul shara jergilikti uıymdardyń salyq tóleýden jaltaryp, sheteldik valıýtany jasyryp ustaý boıynsha aıyptalǵan birqatar laýazymdy tulǵalarǵa qatysty qylmystyq ispen baılanysty. Osyndaı qylmystar úshin Ózbekstanda segiz jylǵa deıin bas bostandyǵynan aıyrý jazasy kesiledi.
Bolǵan oqıǵadan habardar bolǵan jýrnalıster Gúlnar Karımovanyń jaqyn dostarynyń qamaýǵa alynýyn onyń osy kúngi bılikti ashyq synaýymen baılanysty dep otyr. Osyǵan deıin de Karımovaǵa kúshtep qysym kórsetilgen: 2013 jyldyń qarasha aıynda ol basqarǵan uıymnyń qyzmetkerleri ustalyp, tergeýge alyndy. Olardyń bireýi Grekııanyń azamaty bolyp shyqqan, ony elden shyǵaryp jibergen bolatyn.
