Ózbekstan prezıdenti koronavırýsqa qarsy vaktsınalaýdy tezdetýdi buıyrdy
TAShKENT. QazAqparat - Ózbekstan prezıdenti koronavırýsqa qarsy vaktsınalaýdy tezdetýdi buıyrdy. Bul týraly el prezıdenti Shavkat Mırzıeevtiń tóraǵalyǵymen ótken vedeoselektorlyq keńes qorytyndylaryn shyǵarý kezinde belgili boldy, dep habarlaıdy QazAqparat.
«Turǵyndarǵa koronavırýsqa qarsy vaktsına engizýdi bastaý qajet. Densaýlyq saqtaý mınıstri men Sanıtarlyq-epıdemıologııalyq ahýal jáne qoǵamdyq densaýlyq qyzmetiniń basshysy birinshi kezekte vaktsına egilýi tıis turǵyndar sanatyn anyqtap, elektrondyq tizim qurýy tıis», - dedi Ózbekstan prezıdenti.
Shavkat Mırzıeev sondaı-aq qosymsha mobıldik toptar qurýdy tapsyrdy.
«Otbasylyq emhanalar men aýyldyq dárigerlik pýnkterde vaktsınalaýdyń 3 myń bólimshesin daıarlaý qajet. Sondaı-aq, turǵyndarǵa vaktsına egýmen aınalysatyn mobıldik brıgadalar qurý kerek», - dep túıindedi ol.
Eske sala ketsek, buǵan deıin Sanıtarlyq-epıdemıologııalyq ahýal jáne qoǵamdyq densaýlyq qyzmetiniń basshysy Botırjon Qurbanov Ózbekstan bıligi 2021 jyldyń sońyna qaraı el turǵyndarynyń 20 paıyzyn koronavırýsqa qarsy vaktsınalaýǵa nıetti ekenin málim etken. Onyń sózinshe, jappaı vaktsınalaýdy bastaý aqpan aıynyń sońy, naýryzdyń basyna josparlanǵan.
«Vaktsınalaý protsesi búkil Ózbekstandy qamtıdy, biraq ol kezeń-kezeńmen ótedi. Birinshi kezeńde Pfizer vaktsınasynyń 100 myń dozasyna tapsyrys berildi, taǵy basqa lıtsenzııalanǵan vaktsınalar paıda bolǵan jaǵdaıda, olar da paıdalanylady», - dedi Qurbanov.
Avtory: Mádıbek Jánibekov
