Ózbekstan prezıdenti Qazaqstannyń birinshi vıtse-premerimen yntymaqtastyq jobalaryn talqylady
ASTANA. QazAqparat - Ózbekstan Respýblıkasynyń prezıdenti Shavkat Mırzıeev 23 aqpan kúni Qazaqstan Respýblıkasy Premer-mınıstriniń birinshi orynbasary Asqar Mamındi qabyldady. Asqar Mamın Ózbekstan men Qazaqstan arasyndaǵy ekijaqty yntymaqtastyq jónindegi Birlesken úkimetaralyq komıssııanyń kezekti otyrysyna qatysý úshin Ózbekstanǵa keldi, dep habarlady jahonnews.uz .
Ózbekstan basshysy strategııalyq seriktestik jáne saýda-ekonomıka salasynda ózbekstandyq-qazaqstandyq qarym-qatynastardy damytý men nyǵaıtýdaǵy oń yqpaldy atap ótti.
2016 jyldyń qyrkúıek aıynda eki el basshylarynyń Samarqandtaǵy kezdesýi barysynda qol jetkizilgen ýaǵdalastyqtarǵa sáıkes, birqatar perspektıvalyq jobalar birlesip jasalýda.
2016 jyldyń qorytyndysy boıynsha, eki el arasyndaǵy taýar aınalymy 2 mıllıard dollardan asqan. Ózbekstanda 230-dan astam kásiporyndar qyzmeti qazaqstandyq seriktesterdiń qatysýymen júzege asýda. Ádettegideı, avtokólik jáne temir jol kóligi, áýe qatynastary salasyndaǵy ózara árekettestik belsendi bolyp otyr.
Ózbekstan prezıdenti eki eldiń óńirleri arasyndaǵy tyǵyz qarym-qatynasty ornatý jáne nyǵaıtý qajettigin, osy arqyly saýda baılanystary jáne mádenı almasý múmkindikteri ashylatynyn basa aıtty.
Asqar Mamın jyly qarsy alǵany úshin Shavkat Mırzıeevke shyn júrekten alǵys bildirdi jáne Qazaqstannyń Ózbekstanmen keń aýqymdy yntymaqtastyqqa daıyn ekenin rastady.
