Ózbekstan Prezıdenti halyqty Naýryzben quttyqtady
TAShKENT. 20 naýryz. QazAqparat - Ózbekstan Prezıdenti Islam Kárimov Naýryz merekesine arnalǵan saltanattarǵa qatysty.
Sharalar dástúr boıynsha Ózbekstannyń Álisher Naýaı atyndaǵy Ulttyq saıabaǵynda ótti.
Kóktem merekesimen quttyqtaı otyryp, I.Kárimov: «Naýryz ózbek halqynyń ómirlik kózqarastarymen tolyq úndesedi - bul kúnderi urys-kerister umytylyp, biz túrli ult ókilderiniń arasyndaǵy beıbit ári tynysh ómirdi, dostyq pen aýyzbirlikti, ózaratúsinistik pen kelisimdi baǵasy joq baılyq retinde odan saıyn baǵalap, dáripteı bastaımyz», - dep atap ótti.
«Bul jarqyn sátterde bizdiń qurmetti ardagerlerimizge, analarymyz ben ápkelerimizge, halyqtyń jáne elimizdiń tiregi men úmiti bolyp tabylatyn jalyndy, maqsatqa umtylǵan jastarymyzǵa shyn qurmetim men júrekten shyqqan mahabbatymdy bildiremin. Barlyqtaryńyzdy ishteı qushaqtaı otyryp, búgingi tamasha kóktemgi merekemen taǵy bir ret quttyqtaımyn, sizderge eń jaqsy tilekterimdi bildiremin. Amandyq pen gúldený jylynda Naýryz árbir otbasyna baqyt pen densaýlyq, bereke men molshylyq, týǵan Ózbekstanǵa ilgerilik ákelsin», - dep atap ótti ÓR Prezıdenti.
