Ózbekstan Prezıdenti Tsıfrlyq úkimet ofısimen tanysty

NUR-SULTAN. QazAqparat - Ózbekstan Prezıdenti Tsıfrlyq úkimet ofısimen tanysty. Qazaqstan tarapynan premer-mınıstr Asqar Mamın, Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın, Saýda jáne ıntegratsııa mınıstri Baqyt Sultanov boldy, dep habarlaıdy Tsıfrlyq damý, ınnovatsııalar jáne aeroǵarysh ónerkásibi mınıstrliginiń baspasóz qyzmeti.

Baǵdat Mýsın Prezıdent Shafkat Mırzıeev bastaǵan ózbekstandyq delegatsııaǵa Tsıfrlyq úkimet ofısiniń negizgi mindetteri men jobalary jaıly aıtty. Keńse qyzmetiniń aıasynda bastapqy analıtıka avtomattandyrylyp, boljamdar men damý barysy jasalyp, monıtorıng júrgizilip, maqsatty kórsetkishterge jetýge tosqaýyl bolatyn kedergiler anyqtalady jáne t.b.

Sondaı-aq Baǵdat Mýsın «Tsıfrlandyrý, ǵylym jáne ınnovatsııalar esebinen tehnologııalyq serpilis» ulttyq jobasynyń negizgi baǵyttaryna toqtaldy. Tsıfrlyq memlekettik qyzmetter men bıznes-úderisterdiń reınjınırıngi týraly aıtyp, avtokólikti tirkeý/qaıta tirkeý boıynsha jańa servısti mysalǵa keltirdi. Sonymen qatar halyqty vaktsınalaý barysy men qarqynyna tsıfrlyq monıtorıng jasaý jobasyn tanystyrdy.
QR Saýda jáne ıntegratsııa mınıstri Baqyt Sultanov onlaın tártipte azyq-túlik baǵasyna monıtorıng pen boljam jasaýǵa múmkindik beretin Іshki jáne syrtqy saýda boıynsha analıtıkalyq platformany nazarǵa usyndy.
QR Qarjy vıtse-mınıstri Marat Sultanǵazıev kontragentter arasyndaǵy mámilelerdi onlaın tártipte qadaǵalaýǵa jol ashqan «Elektrondyq shot-faktýralar» júıesin tanystyrdy.