Ózbekstan prezıdenti aqsaqalǵa avtokólik syılady
ASTANA. QazAqparat - Ózbekstan prezıdenti Shavkat Mırzıeev 84 jastaǵy Shodı-bobo Hýshbakovqa Captiva avtokóligin syılady, dep habarlady ÝzA .
Memleket basshysy 10-11 aqpan kúnderi Sýrhandarııa oblysyna barǵan saparynda qarııanyń úıine soǵyp ketken edi.
«Biz Memleket basshysymen otbasylyq ómir, aýyldar, bala tárbıesi, oqý jáne jumys, elde bolyp jatqan ózgerister, jer ıgerýdiń qyr-syry týraly áńgimelestik, - dedi aqsaqal. - Prezıdent bizdiń baqshamyzǵa qarap, Sýrhandarııany jaqsy biletinin, mol ónim alýǵa bolatynyn aıtty».
Shodı-bobo Hýshbakov pen onyń otbasy óz baqshalaryna kartop, qyzanaq, baqsha ónimderi men askókter egip, jylyna úsh ret ónim alady. Ótken jyly aqsaqal bir ǵana kartop túsiminen 25 mıllıon sýmnan astam tabys tapqan.
Aqsaqal Prezıdentke syılyǵy úshin alǵys aıtty jáne onyń adamǵa degen qurmet pen qamqorlyqtyń belgisi retinde qundy ekenin atap ótti.
