Ózbekstan Prezıdenti 2010 jyldy elde «Úılesimdi damyǵan urpaq jyly» dep jarııalaýdy usyndy
TAShKENT. Jeltoqsannyń 7-si. QazAqparat /Qurmat Samarhan/ - Ózbekstan Respýblıkasynyń Prezıdenti Islam Kárimov kelesi 2010 jyldy «Úılesimdi damyǵan urpaq jyly» dep jarııalaý týraly bastama kóterdi.
Bul týraly Ózbekstan Prezıdenti senbi, jeltoqsannyń 5-inde respýblıka Konstıtýtsııasynyń qabyldanýynyń 17 jyldyǵyna arnalǵan saltanatty jınalysta málim etti.
El Prezıdenti óz sózinde sondaı-aq, aǵymdaǵy jyly júzege asyrylǵan jáne 2 trıllıon 612 mıllıard sým jumsalǵan «Aýyldy damytý jáne abattandyrý jylynyń» qorytyndysyn shyǵardy.
Ózbekstan bashysy sonymen qatar, memlekettiń 2010 jyly júzege asyratyn qyzmetteriniń negizgi baǵyttaryn atap kórsetti. «2010 jyldyń memlekettik bıýdjetinde densaýlyq saqtaý salasyna 1 trıllıon 700 mıllıardtaı sým (1 mıllıard 128 mıllıon dollar) qarastyrylǵan, bul soma 2009 jylǵy kórsetkishten 30 paıyzǵa kóp. Jalpy alǵanda, kelesi jylǵy memlekettik bıýdjettiń 50 paıyzdan astamy densaýlyq saqtaý men bilim berý salasyn damytýǵa jumsalmaq. Munyń barlyǵy memlekettiń salaýatty jáne jan-jaqty damyǵan urpaqty tárbıeleý máselesine degen yqylasyn kórsetedi»,- dep atap kórsetti Islam Kárimov óz sózinde.
Saltanatty jınalys merekelik kontsertpen aıaqtaldy.
