Ózbekstan prezıdenti jemqorlyqpen kúreske jaýapty 117 sheneýnikti qyzmetinen bosatýdy tapsyrdy
TAShKENT. KAZINFORM – Ózbekstan prezıdenti Shavkat Mırzıeev Sybaılas jemqorlyqqa qarsy ulttyq keńestiń keńeıtilgen otyrysyn ótkizdi, dep habarlaıdy Kazinform agenttiginiń menshikti tilshisi.
Onyń barysynda Ózbekstan basshysy Sybaılas jemqorlyqqa qarsy is-qımyl agenttiginiń jumysyn synǵa aldy. Shavkat Mırzıeevtiń aıtýynsha, vedomstvo tek statıstıkamen aınalysyp, qylmystardyń aldyn alýǵa den qoımaıdy.
— Agenttik qyzmetkerleri mınıstrlikter men óńirlerge baryp, máseleni naqty sheshýdiń ornyna qozǵalǵan qylmystyq isterdiń sanyn ǵana esepteýmen aınalysyp keledi. ıAǵnı, vedomstvo statıstıstıka qurylymynyń qyzmetin atqaryp otyr, — dedi Ózbekstan basshysy.
Ol atap ótkendeı, eldegi jemqorlyq qylmystarynyń 75%-y aýdandar men mahallıalarda anyqtalǵan. Máselen, paraqorlyq derekteri nysandardy ortalyq ınfraqurylymǵa qosý, lıtsenzııa alý, jeńildikpen beriletin nesıe usyný jáne jumysqa qabyldaý kezinde jıi tirkeledi.
Tıisinshe, Shavkat Mırzıeev salaǵa jaýapty vedomstvo qyzmetkerleriniń jumysyn jetildirýdi tapsyrdy. Osyǵan baılanysty Ózbekstan basshysy premer-mınıstr Abdýlla Arıpovqa 117 mınıstrlik pen memlekettik organdaǵy sybaılas jemqorlyqqa qarsy kúres sharalaryna jaýapty mamandardy jumystan bosatýdy tapsyrdy.
— Olardyń ornyna adal, bilimdi ári kásibı kadrlardy taǵaıyndaý qajet. Sáıkesinshe, olarǵa naqty mindetter júkteý mańyzdy. Budan basqa, mınıstrler óz vedomstvolaryndaǵy sybaılas jemqorlyq qylmystary úshin saıası jaýapkershilik alýy tıis, — dedi Sh. Mırzıeev.
Eske salaıyq, byltyr Ózbekstanda qylmystyq jaýapqa tartylǵan laýazymdy tulǵardyń sany 37,2%-ǵa ósti. Tıisinshe, jemqor sheneýnikter memleketke $278,3 mln zalal keltirdi.
Buǵan deıin habarlaǵanymyzdaı, Ózbekstanda jemqorlyqqa beıim keletin sheneýnikterdi erte anyqtaý tájirıbesi engizilmek.
Sonymen qatar, byltyr kórshiles elde ekonomıkanyń damýyna selqos qaraǵan 300-ge jýyq sheneýnik jumystan bosatyldy.
Munymen birge, Ózbekstanda ınvestıtsııa tartý isinde olqylyqqa jol bergen birqatar joǵary laýazymdy sheneýnik qyzmetin bosatqan bolatyn.
Sonymen qatar, 2024 jyly Ózbekstanda memlekettik qyzmette júrip, kásipkerlik sýbektilerine ıelik etken mınıstrlikterdiń 398 mamany anyqtaldy.