Ózbekstan Prezıdenti: Ortalyq Azııada klımat ózgerisi eki ese jyldam júrip jatyr
ASTANA. KAZINFORM – Shavkat Mırzıeev Ortalyq Azııada klımattyń ózgerýi jahandyq ortasha kórsetkishten eki ese jyldam júrip jatqanyn málimdedi.
— Búginde ekologııalyq máselelerdi klımattyń jahandyq ózgeristerinen bólek qarastyrý múmkin emes. Aımaqta temperatýranyń kóterilý qarqyny eki ese joǵary. Óńirdegi muzdyqtardyń úshten birine jýyǵy joıylǵan. Jaýyn-shashyn rejımi turaqsyzdanyp, sý resýrstarynyń tapshylyǵy artyp keledi, — dedi ol Astanada ótken RES–2026 óńirlik ekologııalyq sammıtinde.
Ózbekstan Prezıdentiniń aıtýynsha, óńirde jerdiń tozýy da ózekti máselege aınalǵan.
— Qazirgi ýaqytta 80 mıllıon gektardan astam jer degradatsııaǵa ushyraǵan, — dedi ol.
Sonymen qatar ol halyqaralyq ekologııalyq yntymaqtastyqtyń álsireýine alańdaýshylyq bildirdi.
— Klımat ózgerisine eń az úles qosqan elder onyń saldarymen jalǵyz qalmaýy tıis. Damýshy elder úshin klımattyq qarjylandyrýǵa, ozyq tehnologııalar men ınnovatsııalarǵa qoljetimdilik qamtamasyz etilýi qajet, — dedi ol.
Onyń aıtýynsha, Ortalyq Azııa elderi ekologııa máselesin óńirlik yntymaqtastyqtyń negizgi basymdyqtarynyń birine aınaldyryp otyr.
— Bul baǵytta óńirlik baǵdarlamalar júzege asyrylyp jatyr, — dedi ol.
Prezıdent Ózbekstanda júzege asyrylyp jatqan ekologııalyq jobalarǵa da toqtaldy.
— «ıAshıl makon» ulttyq baǵdarlamasy aıasynda shamamen 1 mlrd aǵash otyrǵyzyldy. Aral teńiziniń qurǵaǵan tabanynda 2 mıllıon gektardan astam orman alqaby qalyptastyryldy, — dedi ol.
Sondaı-aq sý únemdeý sharalary nátıjesinde jyl saıyn 10 mlrd tekshe metrge jýyq sý únemdelip otyr.
— «Jasyl» energetıkanyń úlesi 30%-ǵa jetti, — dedi Shavkat Mırzıeev.
Sóz sońynda ol Ortalyq Azııa elderin ekologııalyq qaýip-qaterlerge birlesip áreket etýge shaqyrdy.
— Biz táýekelderdi jańa damý múmkindikterine aınaldyrýymyz kerek, — dedi ol.
Aıta keteıik, birneshe eldiń Prezıdenti qatysyp jatqan Óńirlik ekologııalyq sammıt «Ornyqty bolashaqqa ortaq kózqaras» taqyrybymen ótýde.
