Ózbekstan prezıdenti maqta terý naýqanyn sylbyr júrgizgen oblystardy synǵa aldy

TAShKENT. KAZINFORM — Ózbekstan prezıdenti Shavkat Mırzıeev maqta jınaý naýqanyn josparǵa saı uıymdastyra almaǵan sheneýnikterdi synǵa aldy, dep habarlaıdy Kazinform agenttiginiń menshikti tilshisi.

Ózbekstan basshysynyń tóraǵalyǵymen ótken keńeste salaǵa jaýapty jetekshiler esep berdi. Oǵan saı, bıyl respýblıka boıynsha 875 myń gektar jerge maqta egilip, ony jınaýǵa 900-den astam tehnıka jumyldyrylǵan. Sharýalarǵa janarmaı men tyńaıtqyshtar memleket tarapynan jeńildikpen usynylǵan.

Osyǵan qaramastan birqatar óńirde maqta terý qarqyny tómen. Surhandarııa, Horezm, Ferǵana jáne Andıjan oblystaryndaǵy nátıjeler ortasha dep baǵalansa, Samarqand, Syrdarııa jáne Naýaı aımaqtaryndaǵy kórsetkish kóńil kónshitpeıdi.

Tıisinshe, prezıdent qysqa merzim ishinde naýqan qarqynyna ilese almaǵan aýdandarda jedel shtab quryp, ónimdi sapaly jınap, sharýalardyń túıtkilderin jedel sheshýdi tapsyrdy. Bul mindetterdi oryndaý úshin Ózbekstan basshysy 10 kún ýaqyt berdi.

Tapsyrmalardyń oryndalýyn qadaǵalaýǵa Bas prokýratýra ókilderi de tartyldy. Olar naýqannyń josparǵa saı júrgizilýin jáne maqta terýshilerge tólenetin qarajatty baqylaıdy. Sonymen qatar, jalǵan esep usynatyn kompanııalar men sharýalardy anyqtaý da tergeý organdaryna júkteldi.

Aýyl sharýashylyǵy mınıstrliginiń málimetinshe, bıyl tehnıkanyń kómegimen jınalǵan 1 keli maqtaǵa — 1373 (62 teńge), al qolmen terilgen ár keli úshin 2000 sým (90 teńge) aqsha berilip jatyr.

Qosa keteıik, buǵan deıin Ózbekstan prezıdenti Shavkat Mırzıeevtiń synyna ilikken Naryn aýdanynyń ákimi konteınerde turyp jatqanyn jazyp edik. 

Sondaı-aq, taıaýda Ózbekstannyń burynǵy aýyl sharýashylyǵy mınıstrine qatysty sot úkimi shyqty. Eks-mınıstr Qylmystyq kodekstiń 167-baby 3-bóligi boıynsha («Asa iri mólsherdegi qarajatty zańsyz ıemdený nemese jymqyrý») kináli dep tanyldy.