Ózbekstan prezıdenti Qazaqstanmen Odaqtastyq týraly shartty ratıfıkatsııalady
Ózbekstan prezıdenti Shavkat Mırzıeev Qazaqstanmen Odaqtastyq qatynastar týraly shartty ratıfıkatsııalaıtyn zańǵa qol qoıdy, dep habarlaıdy Kazinform menshikti tilshisi eldiń Ádilet mınıstrliginiń baspasóz qyzmetine silteme jasap.
Sharttyń negizgi maqsaty – eki eldiń derbestigin, aýmaqtyq tutastyǵyn jáne ornyqty ekonomıkalyq damýyn odan ári nyǵaıtýǵa baǵyttalǵan memleketaralyq qatynastardyń jańa kezeńin quqyqtyq turǵydan bekitý.
Qujat syrtqy saıasat, qorǵanys jáne qaýipsizdik, kóshi-qon, ónerkásiptik kooperatsııany damytý, transshekaralyq sý resýrstaryn utymdy paıdalaný jóninde birlesken sharalar qabyldaý, parlamentter, saıası partııalar men qoǵamdyq uıymdar arasyndaǵy baılanystardy nyǵaıtýǵa baǵyttalǵan ózara is-qımyldar keshenin qamtıdy.
Sonymen qatar ekijaqty qarym-qatynasty odan ári nyǵaıtý maqsatynda memleket basshylary basqaratyn Joǵary memleketaralyq keńes qurylady. Onda odaqtastyq qatynastardy damytýdyń strategııalyq baǵyttary aıqyndalyp, eń mańyzdy máseleler talqylanady.
Eske salaıyq, Qazaqstan Prezıdenti Qasym-Jomart Toqaev pen Ózbekstan basshysy Shavkat Mırzıeev Odaqtastyq qatynastar týraly shartqa byltyr 22 jeltoqsanda Tashkentte qol qoıǵan bolatyn.
