Ózbekstan prezıdenti Gazadaǵy jaǵdaıǵa qatysty pikir bildirdi

TAShKENT. KAZINFORM – Tashkent halyqaralyq ınvestıtsııa forýmynda sóz sóılegen Ózbekstan prezıdenti Shavkat Mırzıeev Gazadaǵy jaǵdaıǵa alańdaýly ekenin málimdedi, dep habarlaıdy Kazinform agenttiginiń menshikti tilshisi.

— HHІ ǵasyrda bizdiń kóz aldymyzda kóptegen jazyqsyz adamdardyń ajal qushyp jatqanyn eshqandaı sebep ne jaǵdaı aqtaı almaıdy. Bul qaqtyǵystyń jalǵyz sheshimi — BUU Jarǵysy jáne halyqaralyq quqyq talaptary arqyly ádil retteý. Palestına halqy óziniń táýelsiz memleketine ıe bolýǵa haqyly, — dedi Sh. Mırzıeev.

Sonymen qatar Ózbekstan prezıdenti Ýkraınadaǵy jaǵdaı tóńireginde bastalǵan kelissózder nátıje beretinine senim bildirdi.

— Ýkraına aınalasyndaǵy jaǵdaı tek dıplomatııalyq jolmen sheshilýi kerek. Osy rette ózbek tarapy Reseı men Ýkraına arasynda bastalǵan kelissózderdi quptaıdy, — dep toqtaldy kórshiles el prezıdenti.

Shavkat Mırzıeev aımaqtaǵy ahýal jaıly aıta kele, Aýǵanstandaǵy jaǵdaıǵa nazar aýdardy. Ol resmı Kabýldy halyqaralyq arenadan oqshaý qaldyrýǵa bolmaıtynyn jetkizdi.

— Biz bul eldiń qazirgi bıligimen syndarly dıalog júrgizip, Aýǵanstannyń oqshaýlanýyna jol bermeý asa mańyzdy dep sanaımyz. Atalǵan memlekette beıbitshiliktiń ornaýy jáne onyń ekonomıkalyq ilgerileýi barlyq irgeles elderdiń uzaq merzimdi damýy úshin qajetti faktor, — dep atap ótti ol.

Shavkat Mırzıeevtiń sózinshe, búginde halyqaralyq quqyq normalary men dıplomatııanyń kúshi álsireı bastady. Ózbekstan basshysy adamzat úshin mańyzdy máseleler keıingi orynǵa syrǵyp, memleketter qarýlanýǵa kóshkenin atap ótti.

— Álemde qarýlaný úrdisi qaıta qarqyn aldy. Máselen, iri derjavalardyń áskerı shyǵyndary 2010 jyldan beri 1,5 ese ósip, 2,5 trln dollarǵa jetti. Bul rette jahandyq jalpy ishki ónimniń ósimi úshinshi jyl qatarynan tómendep barady, — dep málimdedi Ózbekstan prezıdenti.

Eske salaıyq, qazirgi ýaqytta Ózbekstan astanasynda Tashkent halyqaralyq ınvestıtsııa forýmy ótip jatyr. Іs-sharaǵa 3 myńnan asa sheteldik mártebeli meıman qatysyp otyr. Birer saǵat buryn kórshiles elge Premer-Mınıstr Oljas Bektenov jumys saparymen kelip, forýmda sóz sóıledi.