Ózbekstan Prezıdenti EAEO elderine eńbek mıgratsııasyn birlesip retteýdi usyndy
ASTANA. KAZINFORM – Ózbekstan Prezıdenti Shavkat Mırzıeev Joǵary Eýrazııalyq ekonomıkalyq keńestiń keńeıtilgen quramdaǵy otyrysynda odaq elderin eńbek mıgratsııasyn birlesip retteýge shaqyrdy.
- Bizdiń EAEO-men áriptestigimizdiń basym baǵyttaryn qysqasha aıqyndap ótkim keledi. Birinshiden, Ózbekstan men EAEO elderi arasynda kedergisiz saýdanyń biryńǵaı tsıfrlyq keńistigin qalyptastyrý mańyzdy dep esepteımiz. Áńgime elektrondy saýdaǵa den qoıý, kedendik, fıtosanıtarııalyq jáne veterınarııalyq baqylaý derekterin tsıfrlyq jolmen almasý, taýarlardy sertıfıkattaýdyń, elektrondy qujattardy ózara tanýdyń tásilderin kelise otyryp damytý týraly bolyp otyr. Sondaı-aq, tsıfrlyq tranzıtti engizý arqyly taýar qozǵalysyn baqylaý júıesine qosyp, ótkizý beketterin jańǵyrtý arqyly aqyldy kólik-kedendik baqylaý júıesin qurýǵa kirisken jón, - dedi ol.
Ózbekstan basshysy EAEO-men áriptestik aıasynda ónerkásip kooperatsııasy jańa serpin alyp kele jatqanyn atap ótti.
- Biz bıznestiń óndiristi jergiliktendirýge, tehnologııalyq áriptestik arqyly jańa óndiris tizbegin qurýǵa degen qyzyǵýshylyǵy artqanyn, kórip otyrmyz. Uıymdasqan eńbek mobıldiligi salasyndaǵy áriptestikti jumyspen qamtýdyń ulttyq elektrondy servısterdi túıistirý esebinen jańa sapa deńgeıine shyǵarý mańyzdy dep esepteımiz. Áńgime azamattarǵa bos jumys oryndary men jumysqa ornalastyrý sharttary týraly, kóshi-qon normalary týraly aqparatqa tikeleı qol jetkizý múmkindigin beretin qolaıly ári irkilissiz tsıfrlyq orta qalyptastyrý týraly bolyp otyr. Bul memleketterimizdiń eńbek naryǵyndaǵy qajettilikterin bir ýaqytta eskerýge, jumysshylardyń biliktiligin arttyrýǵa, azamattardyń quqyǵyn qorǵaýǵa, zańdastyrylmaǵan jumyspen qamtý qaterlerin azaıtýǵa múmkindik beredi, - dedi Shavkat Mırzıeev.
Aıta keteıik, Astana qalasynda Qazaqstan tóraǵalyǵy aıasynda Joǵary Eýrazııalyq ekonomıkalyq keńestiń eki kúndik otyrysy ótip jatyr.
