Ózbekstan Prezıdenti Ákimshiliginiń basshysy Saıda Mırzıeevaǵa jańa ókilettik berildi
TAShKENT. KAZINFORM – Ózbekstan prezıdenti Shavkat Mırzıeevtiń «Memlekettik basqarý júıesindegi tıimdilik pen nátıjeni arttyrýǵa baǵyttalǵan sharalar týraly» jarlyǵyna saı, Saıda Mırzıeevaǵa jańa ókilettilik berildi, dep habarlaıdy Kazinform agenttiginiń menshikti tilshisi.
Qujatta jazylǵandaı, Prezıdent Ákimshiligindegi kadr, uıymdastyrý jáne saraptama máseleleri boıynsha negizgi ókilettikter Saıda Mırzıeevaǵa ótti. Tıisinshe, oǵan prezıdent keńesshileri men ákimshilikke qarasty bólimshe bastyqtarynyń orynbasarlaryn, hatshylyqtyń jetekshisin jáne ózge de basshylyq laýazymdaǵy tulǵalardy qyzmetinen bosatý nemese taǵaıyndaý quqyǵy berildi.
Budan basqa, Prezıdent Ákimshiliginiń basshysy damý strategııalary men baǵdarlamalardy júzege asyrý úshin otandyq jáne sheteldik mamandar men sarapshylardy tartýǵa quqyly. Olarǵa usynylatyn eńbekaqy mólsherin jáne ony qandaı valıýtada tóleıtinin Saıda Mırzıeeva ózi sheshedi.
Shavkat Mırzıeevtiń jarlyǵyna sáıkes, Saıda Mırzıeevaǵa eki aptanyń ishinde Prezıdent Ákimshiligi qyzmetkerleriniń jumysyn baǵalaý, olardy attestatsııadan ótkizý jáne qabiletti kadrlardy irikteý mindeti júkteldi.
Shavkat Mırzıeevtiń keńesshileri men Prezıdent Ákimshiligine qarasty qurylymdyq bólimshelerdiń jetekshileri 10 kún ishinde jaýapty salalaryn damytý boıynsha usynys ázirlep, jospardy Saıda Mırzıeevanyń qaraýyna engizýi tıis.
Eske salaıyq, birneshe kún buryn Ózbekstan basshysy Prezıdent Ákimshiliginiń jańa qurylymyn bekitti. Oǵan saı, endi Prezıdent Ákimshiligi basshysynyń 5 orynbasary bolady. Olar bilim berý, kásipkerlik sala, sot-quqyq júıesi, densaýlyq saqtaý men sý resýrstary baǵyttaryndaǵy jobalardyń iske asýyn qadaǵalaıdy.
Munymen birge, strategııalyq damý jáne syrtqy saıasat jónindegi prezıdent keńesshileri laýazymy engizildi.
Sondaı-aq, qarjy tehnologııalary, tsıfrlandyrý jáne jasandy ıntellekt, kreatıvti ekonomıka, qoǵamdyq qaýipsizdik, prezıdenttiń aımaqtarǵa jasaıtyn saparlaryna oraı taldaý materıaldaryn ázirleıtin kommýnıkatsııalar departamentteri quryldy.
Eske salaıyq, bıyl 23 maýsymda Shavkat Mırzıeevtiń jarlyǵymen Prezıdent Ákimshiliginiń basshysy laýazymy qaıta jasaqtaldy. Tıisinshe, ony buryn memleket basshysynyń kómekshisi bolǵan Saıda Mırzıeeva ıelendi.
Naqtylaı keteıik, Shavkat Mırzıeev 2023 jyldyń tamyzynda Ózbekstan Prezıdenti Ákimshiliginiń qurylymyna reforma jasady. Keıin Prezıdent Ákimshiliginiń basshysy laýazymy joıyldy. Sáıkesinshe, prezıdent kómekshileriniń qatary kóbeıdi. 2022-2023 jyldar aralyǵynda Prezıdent Ákimshiligin Sardor Ýmýrzakov basqarǵan edi.