Ózbekstan prezıdenti 392 sottalýshyǵa raqymshylyq jasady

ASTANA. KAZINFORM — Naýryz merekesi men Oraza aıtyn toılaý qarsańynda Ózbekstan Respýblıkasynyń prezıdenti Shavkat Mırzıeev «Jazasyn ótep jatqan, is-áreketterine shyn júrekten ókinip, túzelý jolyna túsken bir top adamǵa raqymshylyq jasaý týraly» jarlyqqa qol qoıdy, dep habarlaıdy ÓzA. 

Jarlyqqa boıynsha Ózbekstan Respýblıkasy Konstıtýtsııasynyń 109-babynyń 23-tarmaǵyna sáıkes, jazasyn ótep jatqan, is-áreketterine shyn júrekten ókinip, túzelý jolyna túsken 392 adamǵa raqymshylyq jasaldy.

Raqymshylyqqa ilingenderdiń 223-i negizgi jazadan tolyq bosatyldy, 82-si jazasyn óteýden shartty túrde merziminen buryn bosatyldy, al 34-iniń jazasy jeńil jazamen aýystyryldy.
Sonymen qatar 53 adamǵa taǵaıyndalǵan bas bostandyǵynan aıyrý merzimi qysqartyldy.
Raqymshylyqqa ilingenderdiń 3-eýi sheteldik azamattar, 26-sy áıelder, 14-i 60 jastan asqan er adamdar, 166-sy jastar jáne 24-i tyıym salynǵan uıymdardyń qyzmetine qatysqan adamdar.

Jarlyqqa sáıkes, jaýapty mınıstrlikter men vedomstvolarǵa raqymshylyqqa ilingenderdi otbasylary men jaqyndaryna qaıtarý, olardyń qoǵamdyq ómirge beıimdelýine, paıdaly jumyspen aınalysýyna, salaýatty ómir saltyn qalyptastyrýyna jáne qoǵamda laıyqty oryn tabýyna kómektesý boıynsha tıisti tapsyrmalar berildi.

Eske sala keteıik, byltyr Ózbekstanda jemqorlyqqa barǵan 252 ákimdik qyzmetkeri qylmystyq jaýapqa tartyldy.