Ózbekstan parlamentine saılaý boıynsha qaıta daýys berý bolady
ASTANA. Qańtardyń 10-y. QazAqparat - Ózbekstan parlamentiniń tómengi palatasyna jáne jergilikti keńesterge halyq depýtattaryn saılaý boıynsha búgin,
jeksenbi kúni respýblıkada qaıta daýys berý bolady, dep habarlaıdy «RIA «Novostı» agenttigi.
Buǵan deıin, 2009 jyly jeltoqsannyń 27-sinde respýblıkada atalmysh ókiletti organdarǵa jalpyhalyqtyq saılaý ótken bolatyn. Biraq parlamentke depýtattar saılaý boıynsha 39 saılaý okrýgi men jergilikti ókiletti organdarǵa depýtattar saılaý boıynsha 779 saılaý okrýginde kandıdattar qajetti daýystar sanyn jınaı almady.
Saılaý zańnamasy boıynsha, qaıta daýys berýge eń kóp daýys alǵan eki kandıdat qatysady. Qaıta daýys berý kezinde saılaýshylardyń kóbirek daýsyn alǵan kandıdat depýtat bolyp saılanady.
Daýys berýdiń birinshi týryna Ózbekstannyń 15,1 mıllıon azamaty qatysty, bul saılaýshylardyń jalpy sanynyń 87,8 paıyzyn quraıdy.
