Ózbekstan óziniń «asa ónegeli» áleýmettik jelisin iske qospaq
ASTANA. 23 tamyz. QazAqparat - 1 qyrkúıekten bastap Ózbekstanda batystyq balamalarǵa básekeles bola alatyn jańa «Muloqot.Uz» áleýmettik jelisi iske qosylady,
dep habarlaıdy IA REGNUM.
Muloqot.Uz áleýmettik jelisi avtorlarynyń aıtýynsha, olardyń jobasy «jalpyadamgershilik qundylyqtary men ulttyq salt-sanany, teń quqylyq pen tózimdilik qaǵıdalaryn nasıhattap, jastardyń moraldik jáne fızıkalyq salaýattylyǵyn jaqsartý, olardyń boıynda joǵarǵy adamgershilik qasıetin qalyptastyrý úshin jaǵdaı jasaıtyn bolady». Muloqot.Uz áleýmettik jelisine uıaly telefony tek Ózbekstanda tirkelgen paıdalanýshylar ǵana tirkele alady, dep habarlaıdy Polıt.rý.
Resmı málimetterge sáıkes, «Odnoklassnıkı.rý» saıtyna Ózbekstannan kúnine 350-400 myń paıdalanýshy kirip-shyǵatyn kórinedi, al álemge áıgili «Facebook» áleýmettik jelisine 85 myń ózbekstandyq tirkelgen.
Ózbekstan baılanys jáne aqparattandyrý agenttiginiń málimetteri boıynsha, 2011 jyldyń basynan bastap Ózbekstandaǵy Internet-paıdalanýshylardyń sany 7,7 mln-ǵa jetti, onyń 4,27 mln. Internetke uıaly telefon arqyly kiredi.
