Ózbekstan otandyq dári-dármek óndirisin arttyrmaq
Ózbekstan otandyq dári-dármek óndirýshilerdiń úlesin 18-den 40%-ǵa deıin ulǵaıtý úshin jaǵdaı jasamaq. Farmatsevtıka salasyn damytý máseleleri jónindegi keńeste Ózbekstan Prezıdenti Shavkat Mırzıeev jaýapty organdarǵa osyndaı tapsyrma berdi, dep habarlaıdy Kazinform agenttiginiń menshikti tilshisi.
Keńeste atalǵan salany damytý úshin Ózbekstanda qajetti shıkizat resýrstarynyń bar ekeni jáne barlyq jaǵdaıdyń jasalǵany aıtyldy.
«Sońǵy alty jylda farmatsevtıka óndirisi 3 ese, eksport 6 ese ósti. Quny 525 mln dollar bolatyn 177 joba iske qosyldy, jalpy 50 myń jumys orny quryldy. Budan da aýqymdy kórsetkishterge qol jetkizýge múmkindigimiz bar. Jyl saıyn halyq 1,6 mlrd dollarǵa dári-dármek satyp alady. Al otandyq óndirýshilerdiń úlesi nebári 18% quraıdy, qalǵany ımport esebinen qamtamasyz etiledi», - dedi Shavkat Mırzıeev.
Osyǵan baılanysty tıisti organdarǵa kásipkerlerdiń jobasyn qoldaý, sheteldik tájirıbeni zerdeleý jáne tanymal brendterdi elge tartý boıynsha tapsyrma júkteldi.
«Elde jıi tutynylatyn 50 dári-dármek óndirisin uıymdastyrý arqyly oqshaýlaýdy 35%-ǵa deıin arttyrý qajet. Sondaı-aq, «Tashkent Pharma Park» klasteriniń qurylysyn jedeldetip, oǵan jeke seriktesterdi tartý qajet», - dep tapsyrma berdi Ózbekstan basshysy.
Ol úshin farmatsevtıkalyq kásiporyndarǵa GMP halyqaralyq standartyna kóshýge jáne tańbalaý júıesin engizýde kómek kórsetiletin bolady. Jalpy bul salada 1,5 mlrd dollarǵa baǵalanǵan 173 joba qolǵa alynbaq. Ony qarjylandyrýǵa 600 mln dollar bólinedi. Atalǵan jobalardy iske asyrý nátıjesinde 2024 jyly 400 mln dollardyń ónimin óndirý josparlanǵan.
