Ózbekstan «Ortalyq Azııa» SEO-ǵa qatysty pozıtsııasyn ózgertip jiberdi - Sultanov

NUR-SULTAN. QazAqparat – Ózbekstan «Ortalyq Azııa» saýda-ekonomıkalyq ortalyǵyna qatysty pozıtsııasyn ózgertip jiberdi. Bul týraly Úkimet otyrysynda QR Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.

«Ortalyq Azııa» Halyqaralyq saýda-ekonomıkalyq ortalyǵy jobasyn iske asyrý maqsatynda ózbek tarapymen onyń ornalasatyn jeri kelisildi. Búgingi tańda biz jer telimin bólip, ınvestormen kelissózder júrgizýdemiz. Alaıda, ózbek tarapynyń pozıtsııasy ózgerýine baılanysty jobany iske asyrý protsesi keshiktirilip jatyr», - dedi ol.

Mınıstr osyǵan oraı Qazaqstan tarapy jobany iske asyrýdyń qosymsha nusqalaryn qarastyryp jatqanyn aıtty.

«Jalpy, bul ortalyq Ózbekstanmen shekaralyq saýdany «aǵartý» jáne saýda ınfraqurylymyn qurý arqyly eki eldiń arasyndaǵy ózara saýda kólemin 10 mlrd AQSh dollarǵa deıin ulǵaıtýǵa yqpal etedi», - dedi Baqyt Sultanov.

Eske salaıyq, 26 qańtar kúni ótken Úkimettiń keńeıtilgen otyrysynda Memleket basshysy Qasym-Jomart Toqaev «Ortalyq Azııa» halyqaralyq saýda ortalyǵyn tezirek salýdy tapsyrǵan bolatyn.