Ózbekstan Ortalyq Azııadaǵy ıntegratsııany ilgeriletý úshin BUU qararyn qabyldaýdy usyndy

TAShKENT. KAZINFORM – Ózbekstan Ortalyq Azııadaǵy óńirlik seriktestik pen ekonomıkalyq ıntegratsııany tereńdetýge baǵyttalǵan BUU Bas Assambleıasynyń qararyn qabyldaýdy usyndy, dep habarlaıdy Kazinform agenttiginiń menshikti tilshisi.

Atalǵan bastamany BUU minberinen sóz sóılegen kórshiles eldiń prezıdenti Shavkat Mırzıeev kóterdi.

– 8 jyl buryn biz aldymyzǵa Ortalyq Azııany beıbitshilik, tatý kórshilik jáne seriktestik keńistigine aınaldyrý maqsatyn qoıdyq. Tıisinshe, óńir elderi osy strategııalyq mejege qol jetkizdi. ıAǵnı, jabyq shekaralar men sheshimin tappaǵan daýyly máseleler dáýiri aıaqtaldy, - dedi Shavkat Mırzıeev.

Ózbekstan basshysy atap ótkendeı, keıingi jyldary óńirdegi ózara saýda, ınvestıtsııa jáne kólik tasymaly kólemi 5 ese artty. Qazirgi ýaqytta ónerkásiptik kooperatsııany damytýǵa erekshe nazar aýdarylyp, birlesken ınfraqurylymdyq jobalar iske asyp jatyr.

Sondaı-aq Shavkat Mırzıeev óńirlik ıntegratsııany ilgeriletý jolynda Ortalyq Azııa memleketteri basshylarynyń Konsýltatıvtik kezdesýiniń mańyzdy ról atqarǵanyna toqtaldy.

– Búginde Jańa Ortalyq Azııanyń qalyptasý úrdisi bastaldy. Óńirdegi birlik, turaqtylyq jáne aımaqtyq biregeılik Ortalyq Azııanyń halyqaralyq arenadaǵy saıası salmaǵyn arttyrdy, - dep málim etti Ózbekstan prezıdenti BUU minberinde sóılegen sózinde.

Osy maqsattarǵa qol jetkizý úshin biz barlyq sheteldik áriptesimizben ózara tıimdi baılanystardy keńeıtýge basymdyq berýge nıettimiz.

Eske salaıyq, 23 qyrkúıekte Qazaqstan Prezıdenti Qasym-Jomart Toqaevtyń BUU Bas Assambleıasynyń 80-shi sessııasyndaǵy Jalpy debatta sóz sóılep, uıymǵa reforma jasaý bastamasyn kótergen bolatyn.