Ózbekstan Ortalyq Azııa elderi qoǵamdastyǵyn qurýdy usyndy

TAShKENT. KAZINFORM – Ózbekstan prezıdenti Shavkat Mırzıeev Ortalyq Azııa memleketteri basshylarynyń Konsýltatıvtik kezdesýin strategııalyq format deńgeıine kóterýdi usyndy, dep habarlaıdy Kazinform agenttiginiń menshikti tilshisi.

Shavkat Mırzıeev sammıtke tóraǵalyq ete otyryp, birqatar bastama kóterdi. ıAǵnı, ol kezdesýdiń formatyna ózgeris engizip, onyń bedelin arttyrý qajettigin aıtty.

– Bizdiń kezdesýlerimizdi óńirlik dıalog deńgeıinen Ortalyq Azııa qoǵamdastyǵynyń strategııalyq formaty dárejesine kóteretin ýaqyt keldi. Osyǵan baılanysty onyń ınstıtýtsıonaldyq jáne uıymdastyrýshylyq negizderiniń naqty máselelerin zerdeleıtin konsýltatıvtik kezdesýler týraly ereje ázirleýdi usynamyz. Rotatsııalyq negizde jumys isteıtin hatshylyq qurylsyn. Ulttyq úılestirýshilerdiń mártebesin prezıdentterdiń arnaıy ókilderi deńgeıine kóterý qajet, - dedi Ózbekstan basshysy.

Sondaı-aq Shavkat Mırzıeev ortaq qundylyqtar men halyqtyq dıplomatııa dástúrlerine súıene otyryp, baı ómirlik tájirıbege ıe qoǵam qaıratkerleriniń qatysýymen Aqsaqaldar keńesin qurýdy usyndy. Onyń oıynsha, bul bastama urpaqtar arasyndaǵy baılanysty tereńdetýge,  jalpy óńirlik yntymaqtastyq pen biregeılikti nyǵaıtýǵa yqpal etedi.

Eske salaıyq, sammıt barysynda Ázerbaıjan Ortalyq Azııa basshylary Konsýltatıvtik kezdesýiniń teń quqyly múshesi atandy.