Ózbekstan Orhýs konventsııasyna resmı túrde qosyldy
TAShKENT. KAZINFORM — Ózbekstanda qorshaǵan ortany qorǵaý jáne onyń jaı-kúıi týraly senimdi aqparatpen qamtamasyz etý boıynsha ulttyq deńgeıde sharalar kúsheıtilýde, dep habarlaıdy ÓzA.
Bul Ózbekstan Respýblıkasy Konstıtýtsııasynyń 49-babynda bekitilgen. Osy turǵyda «Qorshaǵan ortany qorǵaý máseleleri boıynsha sheshimder qabyldaýǵa qoǵamnyń aqparatqa qol jetkizýi, qatysýy jáne sot tóreligine qoljetimdiligi týraly konventsııaǵa qosylý týraly (Orhýs, 1998 jylǵy 25 maýsym)» zań qabyldandy.
Aqparat úshin aıta keteıik, Orhýs konventsııasy BUU Eýropalyq Ekonomıkalyq komıssııasynyń «Aqparatqa qol jetkizý, qoǵamnyń sheshim qabyldaýǵa qatysýy jáne qorshaǵan orta máseleleri boıynsha ádil sot talqylaýyna qoljetimdilik týraly» konventsııasy bolyp tabylady.
Konventsııaǵa 1998 jyly 25 maýsymda Danııanyń Orhýs qalasynda ótken Eýropalyq qorshaǵan ortany qorǵaý mınıstrleriniń 4-konferentsııasynda 38 memleket qol qoıdy. Ol adamnyń qorshaǵan ortaǵa quqyqtaryn qorǵaýǵa baǵyttalǵan mańyzdy halyqaralyq qujat sanalady. Ol tıisti memlekettik organdar, azamattar men qoǵam arasynda ekologııalyq aqparatty alýǵa jáne paıdalanýǵa baǵyttalǵan.
Konventsııanyń maqsaty — ekologııaǵa, qorshaǵan ortaǵa jáne azamattardyń densaýlyǵyna teris áser etýi múmkin sheshimder qabyldaýǵa qoǵamnyń qatysýyndaǵy ózara áreketti retteý jáne ádilettilikke qol jetkizý.
Onda memlekettik organdar men uıymdardyń jalpy halyqtyń suranysy boıynsha aýa, atmosfera, sý jáne topyraq sııaqty qorshaǵan orta elementteriniń quramdas bólikteri týraly qajetti aqparatty berýi jáne salany damytýǵa baǵyttalǵan baǵdarlamalar men josparlardy ázirleýge qoǵamnyń qatysýyn qamtamasyz etý kózdelgen.
Eske sala keteıik, Qazaqstandyq mamandar Ózbekstanda sý únemdeý tehnologııalaryn ıgerip jatyr.