Ózbekstan men Úndistan maýsym aıynda eń kóp altyn satyp alǵan

ASTANA. KAZINFORM – Maýsym aıynyń sońyna qaraı Ózbekstan men Úndistan álemdegi eń kóp altyn satyp alǵan elder arasynda kósh bastady. Bul týraly Dúnıejúzilik altyn keńesi (World Gold Council) habarlady.

Álemdik ortalyq bankterdiń rezervteri bir aıda 12 tonnaǵa ósti. Altyn satyp alý kólemi 31 tonna, al satý 18 tonna boldy. Qymbat metaldyń negizgi satyp alýshylary Ózbekstannyń Ortalyq banki men Úndistannyń rezervtik banki boldy – árqaısysy 9 tonnadan. Polsha – 4 tonna, Katar – 3 tonna, Iordanııa men Chehııa – árqaısysy 2 tonna, Túrkııa 1 tonna altyn satyp alǵan.

Maýsym aıynda altyn satý boıynsha kóshbasshy Sıngapýrdyń Ortalyq banki boldy — 12 tonna. Qazaqstannyń Ulttyq banki 6 tonna altyn satty.

Jyl basynan beri Ózbekstan satqan altynnyń taza kólemi 7 tonnaǵa jýyqtady. Bul kórsetkish boıynsha kórshi memleket Taıland (10 tonna) pen Fılıppınnen (25 tonna) keıin úshinshi oryndy ıeledi. Qymbat metaldyń negizgi satyp alýshylary Túrkııa, Úndistan jáne Qytaı boldy.

Maýsym aıynda Ózbekstannyń altyn-valıýta qory 293,7 mıllıon dollarǵa azaıyp, 36,34 mıllıard dollar boldy. Altynnyń fızıkalyq kólemi 9,3 tonnaǵa ósti, biraq valıýta qory 800 mıllıon dollarǵa azaıdy.

Maýsym aıynda altyn baǵasy bir ýntsııa úshin 2350 dollardan 2325 dollarǵa deıin (-1%) tómendedi. Biraq 1 tamyzda altynnyń baǵasy buryn-sońdy bolmaǵan joǵary deńgeıge kóterilip, bir ýntsııa úshin 2501 dollardan asty.