Ózbekstan men Túrikmenstan ózara taýar aınalymyn 2 mlrd dollarǵa jetkizbek
SAMARQAND. KAZINFORM – Búgin Samarqand qalasynda Ózbekstan prezıdenti Shavkat Mırzıeev pen Túrikmenstan Halk Maslahatynyń Tóraǵasy Gýrbangýly Berdimuhamedov kelissóz júrgizdi, dep habarlaıdy Kazinform agenttiginiń menshikti tilshisi.
Taraptar kezdesýinde ózbek-túrikmen qarym-qatynasyn tereńdete túsý múmkindikteri talqylandy. Ásirese, Sh.Mırzıeev pen G.Berdimuhamedov ózara taýar aınalymyn arttyrý jobalaryna den qoıdy. Máselen, byltyr qos el arasyndaǵy saýda-sattyq 1,1 mlrd dollarǵa teńeldi. Aldaǵy jyldary bul kólemdi 2 mlrd dollarǵa jetkizý josparlanyp otyr.
Ózbekstan prezıdenti men Túrikmenstan Halk Maslahatynyń Tóraǵasy óńirlik yntymaqtastyqty ilgeriletýge baǵyttalǵan bastamalarǵa aıryqsha toqtaldy. Atap aıtqanda, taraptar «Ortalyq Azııa plıýs +» formatyndaǵy aldaǵy sammıtter men bıyl Tashkentte ótetin Ortalyq Azııa memleketteri basshylarynyń jetinshi Konsýltatıvtik kezdesýinde kóteriletin máselelerge qatysty pikir almasty.
Ekijaqty kelissóz aıaqtalǵan soń Sh.Mırzıeev G.Berdimuhamedovti Ózbekstannyń joǵary memlekettik nagradasy «Olıı Darajalı Dўstlık» (Joǵary Dárejeli Dostyq) ordenimen marapattady.
Eske salaıyq, buǵan deıin Túrikmenstan Halk Maslahatynyń Tóraǵasy Gýrbangýly Berdimuhamedov Qazaqstanda saparmen bolyp, Memleket basshysy Qasym-Jomart Toqaevpen beıresmı kezdesý ótkizdi.
Keıin ol Qyrǵyzstanǵa saparlap, prezıdent Sadyr Japarovpen kelissóz júrgizdi.