Ózbekstan men Túrkııa qorǵanys salasyndaǵy ózara is-qımyldy nyǵaıta túspek
TAShKENT. KAZINFORM – Ózbekstan prezıdenti Shavkat Mırzıeevtiń Túrkııaǵa jasaǵan resmı sapary barysynda 20 qujatqa qol qoıyldy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Sapar barysynda eki el basshylary áýeli shaǵyn quramda kezdesý ótkizdi. Onyń aıasynda Shavkat Mırzıeev pen Rejep Taııp Erdoǵan ózbek-túrik qarym-qatynasyn nyǵaıtý, saıası, saýda-ekonomıkalyq jáne mádenı-gýmanıtarlyq salalardaǵy yntymaqtastyqty tereńdetý máselelerin talqylady.
Sondaı-aq, taraptar ózara taýar aınalymyn 5 mlrd dollarǵa jetkizýge ýaǵdalasty. Eki el prezıdentteri aýyl sharýashylyǵy, sý resýrstaryn basqarý jáne tsıfrlandyrý salasyndaǵy áriptestikti keńeıtý máselelerin de sóz etti.
Buǵan qosa, Shavkat Mırzıeev pen Rejep Taııp Erdoǵan qaýipsizdik pen qorǵanys, terrorızm, ekstremızm jáne radıkalızmge qarsy is-qımyl boıynsha seriktestikti nyǵaıtý qajettigin atap ótti.
Bul rette Ózbekstan men Túrkııa basshylary Gaza sektoryndaǵy zorlyq-zombylyqty tez arada toqtatý jáne Palestına-Izraıl qaqtyǵysyn beıbit jolmen sheshýdiń mańyzdylyǵyna toqtaldy.
«Turaqtylyq pen uzaq merzimdi beıbitshilik ornatý úshin táýelsiz ári erkin Palestına memleketin qurý qajet», - dep málim etti Sh.Mırzıeev.
Shaǵyn quramdaǵy kezdesýden soń Shavkat Mırzıeev pen Rejep Taııp Erdoǵannyń tóraǵalyǵymen ózbek-túrik Іskerlik keńesiniń birinshi otyrysy ótti. Oǵan eki eldiń jetekshi kompanııalarynyń basshylary da qatysty.
Keńeste taraptar ekijaqty saýda-ekonomıkalyq yntymaqtastyqty odan ári arttyrý maqsatynda ónerkásiptik kooperatsııany ilgeriletý, qosylǵan qun salyǵy joǵary taýarlar óndirisin óz aýmaǵyna shoǵyrlandyryp, sol arqyly ózge elderdiń naryǵyna birlesip shyǵý máselelerin qarastyrdy.
Munymen qatar, preferentsııalyq saýda týraly kelisim sheńberinde kedendik tarıfterdi tómendetý, Stambýl qalasynda Ózbekstannyń saýda ókildigin ashý boıynsha kelisimder jasaldy.
Kelissóz barysynda eki eldiń kólik-logıstıkalyq áleýetin, onyń ishinde Orta dálizdiń múmkindikterin tıimdi paıdalaný tetikteri talqylandy.
Odan keıin Strategııalyq yntymaqtastyq keńesiniń úshinshi otyrysy ótti. Onyń qorytyndysy boıynsha Ózbekstan men Túrkııa basshylar keshendi strategııalyq áriptestikti tereńdetý týraly birlesken deklaratsııaǵa qol qoıdy.
Jalpy kelissózder nátıjesinde taraptar áriptestiktiń san salasyn qamtıtyn 19 qujatqa qol qoıdy. Sáıkesinshe, qos prezıdent óz úkimetterine ár baǵytty damytýǵa arnalǵan «Jol kartasyn» ázirleýdi tapsyrdy.
