Ózbekstan men Tájikstan ózara taýar aınalymyn $2 mlrd jetkizýge nıetti
TAShKENT. KAZINFORM – Tashkentke memlekettik saparmen kelgen Tájikstan prezıdenti Emomalı Rahmon men Ózbekstan basshysy Shavkat Mırzıeev ekijaqty kelissózder júrgizip, birqatar qujatqa qol qoıdy, dep habarlaıdy Kazinform agenttiginiń Tashkenttegi menshikti tilshisi.
Áýeli shaǵyn quramda kezdesken prezıdentter eki memleket arasyndaǵy yntymaqtastyqtyń qarqyndy damyp kele jatqanyn atap ótti.
- Biz Joǵary memleketaralyq keńestiń birinshi otyrysyn ótkizdik. Bul format ekijaqty yntymaqtastyqty sapaly deńgeıge shyǵaryp, strategııalyq áriptestik pen odaqtastyq qatynastardy nyǵaıtýǵa serpin beredi, - dedi Shavkat Mırzıeev.
Kelissóz barysynda taraptar ózara alys-beris kólemin arttyrý, ónerkásiptik kooperatsııanyń ilgeriletý, kólik baılanysyn nyǵaıtý jáne energetıka salasyndaǵy yqpaldastyqty tereńdetý múmkindigin talqylady.
Byltyr eki el arasyndaǵy saýda-sattyq 1 mlrd dollarǵa jýyqtady. Ónerkásip, qurylys, toqyma, elektrotehnıka, farmatsevtıka jáne ózge de salalardaǵy kooperatsııalyq jobalar tabysty júzege asyp jatyr.
Emomalı Rahmon men Shavkat Mırzıeev oń dınamıkaǵa toqtala kele, 2028 jylǵa qaraı taýar aınalymyn 2 mlrd dollarǵa jetkizýge ýaǵdalasty. Buǵan «Oıbek – Fotohobod» shekara mańyndaǵy saýda ortalyǵyn qurý, taýarlardy sertıfıkattaý jáne «E-Permit» júıesin engizý bastamalary yqpal etedi.
Kezdesý qorytyndysy boıynsha taraptar 15-ten astam qujatqa qol qoıyp, ár baǵyt boıynsha «Jol kartasyn» ázirleýge ýaǵdalasty.
Osyǵan deıin Ózbekstanda otasqanyna bir jyl tolmaǵan erli-zaıyptylardyń ajyrasýyna shekteý engiziletini týraly jazdyq.
