Ózbekstan men Reseıde pııaz qymbattaǵan soń, eksportqa shekteý qoıdyq – Erbol Qarashókeev
«Biz 1,1 mln tonna pııaz óndirgenbiz. Ózimizdegi tutyný kólemi 300 tonna ǵana. Mysaly, byltyr 800 myń tonna pııaz ózimizge de, eksporttaýǵa da tolyq jetken. Bıyl álem boıynsha óte qıyn jaǵdaı týyndap tur. Negizgi pııaz óndirýshi elder túrli tabıǵı sebepterge baılanysty jyldaǵy kólemdi bere almady. Aıtalyq, Pákistanda qıyndyqtar bar. Al bul el pııazdyń álemdik qoımasy sanalatyn. Bir jerinde sý tasqyny, bir jerinde qýańshylyq boldy. Bul elderde eksport kólemi kúrt qysqardy da, bizdiń pııazdy kórshiles elderge shyǵara bastady. Qazir qarap otyrmyz, ózimizde pııazdyń 100 myń tonnadan astam qory bar. Erte pisetin pııaz kelgenshe, kóktemge deıin osy pııazdy saqtaý kerek. Osyǵan baılanysty vedomstvoaralyq komıssııa pııazdy syrtqa shyǵarýǵa shekteý qoıý týraly sheshim qabyldady», - dedi ol.
Vedomstvo basshysy shekteý merzimi 3 aı bolǵanymen, naryqtaǵy jaǵdaı ózgermese, 6 aıǵa deıin sozylýy múmkin ekenin aıtty.
«Meniń túsingenimshe, shekteý 6 aıǵa sozylýy múmkin. Biraq aı saıyn naryqtaǵy jaǵdaıdy baqylap otyramyz. Qazirdiń ózinde bizdiń óndirýshiler óte kóp pııazdy syrtqa shyǵaryp áketken – jaqsy baǵamen eksporttaǵan. Bizdiń pııazdyń baǵasy kóterme deńgeımen kelisine 150-170 teńge bolyp tur. Al Reseıdi, Ózbekstan sııaqty basqa da kórshilerimizdi qarasańyzdar, ol jaqta kóterme baǵanyń ózi 240 teńgeden asyp ketken. Sondyqtan pııaz baǵasyn turaqty saqtaý úshin syrtqa shyǵarýǵa shekteý qoıylyp otyr. Dál qazir 3 aıǵa shekteý engizilgen. Naryqtaǵy jaǵdaı ózgerip jatsa, soǵan sáıkes áreket etemiz», - dedi Erbol Qarashókeev.
