Ózbekstan men Reseı ekonomıkasyn ózgermeli sý-klımat jaǵdaılaryna beıimdemek
TAShKENT. KAZINFORM – Ózbekstan Ekologııa, qorshaǵan ortany qorǵaý jáne klımattyń ózgerýi mınıstri Azız Abdýhakımov «Gazprombank» AQ birinshi vıtse-prezıdenti Ekaterına Salýgına-Sorokovamen kezdesý ótkizdi, dep habarlaıdy Kazinform vedomstvonyń baspasóz qyzmetine silteme jasap.
Kelissózder barysynda Ózbekstan ekonomıkasyn sý-klımat daǵdarysyna beıimdeýge jáne jahandyq ekonomıkanyń jasyl transformatsııasyna baǵyttalǵan jobanyń keleshegi talqylandy. Bastamany 2025-2026 jyldary júzege asyrý josparlanyp otyr.
Reseı tarapy Ózbekstan ekonomıkasynyń ózgermeli sý-klımat jaǵdaılaryna orta jáne uzaq merzimdi beıimdelýiniń irgeli strategııalaryn ázirleýge baǵyttalǵan birlesken ǵylymı zertteýlerdi uıymdastyrýdy usyndy. Praktıkalyq usynystardy daıyndaý Ózbekstannyń sý-klımat problemalaryn ekonomıkalyq jáne saıası taldaý ortalyqtarynyń quzyretin kúsheıtip qana qoımaı, eki el arasyndaǵy ǵylymı yntymaqtastyqty damytýǵa mańyzdy qadam bolatyny basa aıtyldy.
Mınıstr bul joba Ortalyq Azııa aımaǵyndaǵy ǵylymı-zertteý yntymaqtastyǵy, sondaı-aq bilim men tehnologııa almasý úshin iri alań bola alatynyn atap ótti. Osyǵan oraı, jumys tobyn qurý jáne sý resýrstaryn basqarý salasyndaǵy mamandarmen ózara is-qımyl jasaý úshin Ortalyq Azııalyq qorshaǵan orta men klımattyń ózgerýin zertteý ýnıversıtetine («Green University») oqý saparyn uıymdastyrýǵa da nazar aýdaryldy.
Zertteý nátıjeleri boıynsha «Ózbekstan ekonomıkasyn 2050 jylǵa qaraı ózgermeli sý-klımat jaǵdaılaryna beıimdeý strategııasyn» ázirleý josparlanýda. Sondaı-aq taraptar 2025 jyly ózara tıimdi nátıjelerge qol jetkizý úshin «Qorshaǵan ortany qorǵaý jáne jasyl ekonomıka jyly» aıasynda birlesken ǵylymı jobalardy júzege asyrý jáne turaqty konsýltatsııalar ótkizýdi qosa alǵanda, yntymaqtastyqty keńeıtýge kelisti.
Esterińizge sala keteıik, buǵan deıin Ózbekstan men Reseı áskerı salada strategııalyq áriptestik baǵdarlamasyn qabyldaǵanyn habarlaǵan bolatynbyz.