Ózbekstan men Majarstan strategııalyq áriptestik deklaratsııasyna qol qoıdy

TAShKENT. KAZINFORM — Ózbekstan prezıdenti Shavkat Mırzıeev pen Majarstannyń premer-mınıstri Vıktor Orban Býdapeshtte shaǵyn quramda kezdesip, eki eldiń keleshek yntymaqtastyǵyn talqylady, dep habarlaıdy Kazinform agenttiginiń menshikti tilshisi.

Taraptar áýeli birlesken ınvestıtsııalyq jobalarǵa toqtaldy. Atap aıtqanda, olardyń quny búginde 500 mln dollarǵa jetti. Aldaǵy ýaqytta resmı Tashkent pen Býdapesht 1,5 mlrd eýroǵa baǵalanatyn jańa jobalardy iske asyrmaq.

Buǵan qosa Shavkat Mırzıeev pen Vıktor Orban bıyl shildede Býdapeshtte ótetin úkimetaralyq komıssııanyń kezekti otyrysyna deıin ınvestıtsııalyq áriptestik baǵdarlamasyn ázirleýge ýaǵdalasty. Sondaı-aq, taıaýda ózbek-majar iskerlik keńesi óz qyzmetin qaıta bastaıdy.

Býdapeshtte ótken kezdesý qorytyndysy boıynsha birneshe birlesken qujat qabyldandy. Atap aıtqanda, Shavkat Mırzıeev pen Vıktor Orban Keńeıtilgen strategııalyq áriptestik qarym-qatynas ornatý deklaratsııasyna qol qoıdy.

Munymen birge azamattardy ózara ekstradıtsııalaý sharty, tabıǵı apattardyń aldyn alý jáne joıý salasyndaǵy vedomstvoaralyq ýaǵdalastyq pen atomdy beıbit maqsatta qoldanýdy kózdeıtin kelisimder bar.

Qosa ketsek, bıyl naýryzda Ózbekstan prezıdentiniń Frantsııaǵa memlekettik sapary barysynda Shavkat Mırzıeev pen Emmanıýel Makron strategııalyq áriptestik ornatý týraly birlesken deklaratsııaǵa qol qoıǵan edi.

Buǵan qosa bıyl aqpanda Ózbekstan men Pákistan strategııalyq seriktestik keńesin qurýǵa ýaǵdalasty.