Ózbekstan men Majarstan AES-tiń salqyndatý júıesin qurastyratyn birlesken kásiporyn ashady

TAShKENT. KAZINFORM – Ózbekstan men Majarstan AES-ke qajetti qurǵaq salqyndatý júıesin shyǵaratyn birlesken kásiporyn qurýǵa ýaǵdalasty, dep habarlaıdy Kazinform agenttiginiń menshikti tilshisi.

Tıisti qujat Tashkentte qabyldandy. Kelisimge Uzatom agenttiginiń dırektory Azım Ahmedhadjaev, Majarstannyń Syrtqy ister jáne saýda mınıstrligi men MVM EGI kompanııasynyń ókilderi qol qoıdy.

Birlesken kásiporyndy Ózbekstandaǵy erkin ekonomıkalyq aımaqtardyń birinde qurý josparlanyp otyr.

Eske salaıyq, buǵan deıin Tashkent qalasynda Ózbekstan men Majarstan kelissóz júrip jatqanyn jazyp edik. Kezdesýde taraptar AES-ke qajetti qurǵaq salqyndatý júıesin qurastyrý jáne ony Ózbekstanǵa jetkizý máselelerin talqylady.

Sonymen qatar, Ózbekstan bıligi iri AES salý múmkindigin qarastyryp jatyr.

Buǵan qosa, qazirgi ýaqytta resmı Tashkent az qýatty AES salýǵa kiristi. Árqaısysynyń qýaty 55 MVt bolatyn 6 reaktor (jalpy qýaty - 330 MVt) Djızak oblysyndaǵy Týzkan kólinde boı kóteredi. AES-tiń alǵashqy reaktory 2029 jyldyń sońynda iske qosylmaq. Al ol tolyq qýatta 2033 jyldan bastap jumys isteıdi dep josparlanǵan.

Jaqynda «Alter ego» ıýtýb arnasyna suhbat bergen Uzatom agenttiginiń dırektory Azım Ahmedhadjaev AES-tiń quny 2 mlrd dollardan aspaıtynyn aıtty.

Osyǵan saı, Ózbekstan men Reseı AES salý kelisimshartynyń kúshine ený hattamasyna qol qoıdy.

Sondaı-aq AES salý úshin halyqaralyq konsortsıým qurylady.