Ózbekstan men Qytaı strategııalyq seriktestikti tereńdete túspek
TAShKENT. KAZINFORM — Ózbekstan men Qytaı basshylary strategııalyq seriktestikti bekemdeı túsýge ýaǵdalasty, dep habarlaıdy Kazinform agenttiginiń Ózbekstandaǵy menshikti tilshisi Álıhan Asqar.
ÓR basshysynyń baspasóz qyzmetinen málim etkendeı, Ózbekstan prezıdenti Shavkat Mırzıeev pen Qytaı Halyq Respýblıkasynyń Tóraǵasy Sı Tszınpın birlesken málimdemege qol qoıdy.
«Taraptar túrli salalardaǵy ózara tıimdi yntymaqtastyqty jan-jaqty nyǵaıtýǵa jáne Ózbekstan men Qytaı arasyndaǵy strategııalyq seriktestiktiń mazmunyn barlyq jaǵdaıda tereńdete túsýge umtylysyn rastady», — dep málim etti baspasóz qyzmetinen.
Joǵary deńgeıdegi kelissózden keıin ekijaqty qujattarǵa qol qoıý rásimi ótti.
Eki eldiń úkimetteri arasynda qorshaǵan ortany qorǵaý, tehnıkalyq-ekonomıkalyq yntymaqtastyq jáne memlekettik ǵylymı-zertteý mekemeleriniń yntymaqtastyǵy týraly kelisimder qabyldandy.
Budan bólek, Ózbekstan men Qytaıdyń salalyq mınıstrlikteri men óńirleri arasyndaǵy yntymaqtastyqty keńeıtý týraly hattamalarǵa qol qoıyldy.
Jalpy, Ózbekstan men Qytaı arasyndaǵy taýar aınalymy 50 paıyzǵa óskenin habarlaǵan bolatynbyz.
