Ózbekstan men Qytaı ózara taýar aınalymyn 20 mlrd dollarǵa jetkizbekshi

Ózbekstan men Qytaı basshylary eki el arasyndaǵy taýar aınalymyn aldaǵy 5 jylda 20 mlrd dollarǵa jetkizýge kelisti, dep habarlaıdy Kazinform.

Ózbekstan Prezıdenti baspasóz qyzmetiniń habarlaýynsha, Shavkat Mırzıeev Beıjińde ótken «Bir beldeý, bir jol» III halyqaralyq forýmynda QHR tóraǵasy Sı Tszınpınmen kelissóz júrgizdi.

Ózbekstan Prezıdenti aldymen Qytaı basshysyna shaqyrýy úshin alǵys bildirip, Qytaıdyń qurylǵan kúnimen jáne «Bir beldeý, bir jol» bastamasynyń 10 jyldyǵymen quttyqtady.

«Joba jumys isteı bastaǵan azdaǵan ýaqyt ishinde jalpyǵa birdeı damý men órkendeý úshin qajetti ózara yqpaldastyqtyń ashyq, ınklıýzıvti alańyna aınaldy»,-dedi Shavkat Mırzıeev.

Barlyq baǵyt boıynsha strategııalyq seriktestiktiń besjyldyq baǵdarlamasynyń aıasynda keıingi jyldary qytaılyq ınvestıtsııalardyń kólemi bes ese, kompanııalar sany úsh ese artqandyǵy aıtyldy. Bıylǵy jyl basynan beri ózara saýda kólemi 36 protsentke ósken. Jyl sońyna deıin bul kórsetkish 10 mlrd dollardan asady degen senim bar.

Memleketterdiń basshylary eki el arasyndaǵy taýar aınalymyn aldaǵy bes jylda 20 mlrd dollarǵa jetkizýge bolatynyn aıtty.

Taraptar Qytaıdyń kedeıshilikpen kúres tájirıbesin zertteý men ony engizý boıynsha tájirıbe almasý isine erekshe den qoıdy.

Ózbekstan jastarynyń qytaı tilin meńgerýge degen qulshynystarynyń jyl saıyn artyp kele jatqany aıtyldy.

Kelissóz barysynda sondaı-aq óńirlik jáne halyqaralyq deńgeıdegi ózekti máseleler boıynsha da pikir almasyldy.