Ózbekstan men Qytaı arasyndaǵy vızasyz rejım kelisimi bıyl kúshine enýi yqtımal

TAShKENT. KAZINFORM – Ózbekstan men Qytaı arasynda vızasyz rejım engizýge baǵyttalǵan kelisim bıyl naýryzdan keıin kúshine enýi múmkin, dep habarlaıdy Kazinform agenttiginiń menshikti tilshisi.

Byltyr Ózbekstan men Qytaıdyń Syrtqy ister mınıstrleri azamattarǵa 30 kún ishinde vızasyz qos elge barýǵa múmkindik beretin kelisimge qol qoıǵan bolatyn.

Osy oraıda, BAQ ókilderiniń qatysýymen ótken baspasóz máslıhatynda Uzbekistan Airways kompanııasy tóraǵasynyń orynbasary Shýhrat ıAdgarov atalǵan qujattyń naqty qashan kúshine enetinin aıtty.

- Naýryz aıynan keıin elderimiz arasynda vızasyz rejım týraly kelisim kúshine enýi múmkin. Tıisinshe, jolaýshylar sany 10 ese artady. Sondyqtan múmkindikti tıimdi paıdalanyp, barlyq talapqa saı reıster uıymdastyrýdy josparlap otyrmyz, - dedi Shýhrat ıAdgarov.

Bul rette áýekompanııa Tashkentten Shenchjenge jáne Ferǵanadan Úrimshige jańa reıster ashýdy josparlap otyr.

Eske salaıyq, Uzbekistan Airways kompanııasynyń ushaqtary 20 qańtardan beri Reseıdi aınalyp ótip, Eýropaǵa reıs oryndap jatyr.

Toqtala keteıik, Qazaqstan men Qytaı arasynda vızasyz rejım 2023 jyly 10 qarashada ornady. Oǵan saı, Qazaqstan azamattary Qytaı aýmaǵynda, Qytaı azamattary Qazaqstanda 30 kúnnen aspaıtyn ýaqyt aralyǵynda vızasyz júre alady.