Ózbekstan men Qyrǵyzstan taýar aınalymyn 2 mlrd dollarǵa jetkizbek
TAShKENT. KAZINFORM – Qyrǵyzstan mınıstrler kabınetiniń tóraǵasy Aqylbek Japarov jumys saparymen Ózbekstanda júr, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Aqylbek Japarov Tashkentke 2 mamyrda ushyp keldi. Ony áýejaıdan áriptesi, Ózbekstannyń premer-mınıstri Abdýlla Arıpov qarsy aldy.
Qyrǵyzstan mınıstrler kabınetiniń tóraǵasy aldymen ІІІ Tashkent halyqaralyq ınvestıtsııalyq forýmynyń plenarlyq otyrysyna qatysty. Jıynnan soń ol Ózbekstan prezıdenti Shavkat Mırzıeevpen kezdesti.
Júzdesýde taraptar saýda-ekonomıkalyq qatynastardy odan ári damytý, iri ınvestıtsııalyq jáne ınfraqurylymdyq jobalardy birlesip iske asyrý, energetıka, kólik, logıstıka, mádenı-gýmanıtarlyq salalardaǵy yntymaqtastyqty nyǵaıta túsý máselelerin talqylady.
«Keıingi jyldary Ózbekstan men Qyrǵyzstan arasyndaǵy týrısterdiń sany artyp keledi. Sondaı-aq ózara taýar aınalymynyń 2 ese óskeni baıqaldy. Qazirgi ýaqytta saýda-sattyq kólemin 2 mlrd dollarǵa deıin jetkizý úshin tıisti jumystar júrgizilip jatyr», - dedi Qyrǵyzstan mınıstrler kabınetiniń tóraǵasy.
Munymen qatar Shavkat Mırzıeev pen Aqylbek Japarov Shyǵys pen Batysty jalǵaıtyn Qytaı-Qyrǵyzstan-Ózbekstan temir jolyn salý, Qazaqstan, Ózbekstan jáne Qyrzǵyzstan birlesip salyp jatqan «Qambarata» gıdroelektrostantsııasynyń qurylysyn sóz etti.
Sondaı-aq sapar aıasynda Qyrǵyzstan men Ózbekstan arasyndaǵy ekijaqty yntymaqtastyq jónindegi birlesken úkimetaralyq komıssııanyń 11-shi otyrysy ótti. Buǵan qosa ekijaqty kezdesýler, energetıkalyq jáne qurylys kompanııalarynyń basshylarymen kelissózder júrgizildi.