Ózbekstan men Qazaqstan sý resýrstaryn tıimdi basqarýǵa kúsh salady — sheteldegi qazaq baspasózi
ASTANA. KAZINFORM — Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Belarýstiń tońazytylǵan sıyr eti alǵash ret Qytaıǵa ótti — Altaı aqparaty
Altaıdyń Taıkeshken shekara ótkeli arqyly Belarýsten jetkizilgen tońazytylǵan sıyr eti alǵash ret Qytaıǵa ımporttaldy, dep habarlaıdy Altaı aqparaty.
Atalǵan basylymnyń keltirgen deregine súıensek, 3 naýryz kúni Belarýstiń tońazytylǵan sıyr etin tıegen júk avtokóligi shekaradan sátti ótti. Importtalǵan ónim kólemi — 20 tonna.
Taıkeshken shekara ótkeli 2018 jyly et ónimderin ımporttaýǵa ruqsat etilgen ótkizý beketi retinde belgilengennen beri alǵash ret tońazytylǵan sıyr etin qabyldap otyr.
Mamandardyń aıtýynsha, Qytaı — Mońǵolııa — Reseı baǵytyndaǵy Azııa tas joly torabynyń kólik qatynasy jetilip, tasymal shyǵyny azaıyp keledi. Altaı kedeni kásiporyndarǵa kedendik rásimderdi jedel júrgizýge qoldaý kórsetip, júktiń kedergisiz ótýin qamtamasyz etken.
Ortalyq Azııaǵa jibek qurty eksporttaldy — Halyq gazeti
10 naýryz tańerteń Ankan jibek qurty tuqym fermasy ósirgen 15 000 paraq joǵary sapaly jibek qurty jumyrtqasy resmı túrde tıelip, Tájikstanǵa ushaqpen jóneltildi, dep habarlaıdy Halyq gazeti basylymy.
Qytaılyq BAQ-tyń dereginshe, Shensı ólkesindegi jibek qurty jumyrtqasyn eksporttaýdyń jalǵyz bazasy retinde bul Ankan jibek qurty tuqym fermasynan Ortalyq Azııaǵa bıylǵy jyly jóneltilgen úshinshi tapsyrys.
Aıta keteıik, Ankan jibek qurty tuqym fermasy bıyl óndiris pen satylymda úlken ósimge qol jetkizdi. Naýryz aıynyń basynda ferma Tájikstanǵa 14 600 paraq jibek qurty jumyrtqasyn jáne Túrikmenstanǵa 40 000 paraq eksporttady.
Sondaı-aq Ankandaǵy jaýapty tulǵanyń aıtýynsha, 2026 jylǵa arnalǵan qol qoıylǵan satý kelisimine sáıkes, jyl boıy sheteldik tapsyrystardyń jalpy sany mólshermen 124 000 paraq.
Túrkııanyń Táýelsizdik marshy 105 jasta — TRT
Mehmet Akıf Ersoı qaharman áskerge arnap jazǵan, túrik halqynyń táýelsizdiginiń sımvoly sanalatyn Táýelsizdik marshy 105 jyl buryn qabyldandy, dep jazady Túrkııa Radıo Televızııa portaly.
TRT-nyń dereginshe, Túrkııa Uly Ulttyq Májilisi qurylǵannan keıin bir jyl ótken soń týyndaǵan qajettilikke baılanysty «Ulttyq marsh» jazýǵa arnalǵan, júldesi 500 lıra bolatyn baıqaý uıymdastyrdy.
Baıqaýǵa barynsha kóp adamnyń qatysýy úshin Májilis tarapynan belsendi jumys istep turǵan gazetterge jáne elde qoljetimdi barlyq jerge habar taratyldy. Sonyń nátıjesinde 6 aı ishinde 724 óleń joldanǵan.
Osy 724 óleńdi baǵalaý úshin Májilis quramyndaǵy úkimettiń Ulttyq bilim mınıstrligi arnaıy komıssııa qurdy. Komıssııaǵa taǵaıyndalǵan mamandar 724 óleńdi saraptap, 6 óleńdi iriktep alady.
Aqshalaı syılyq taǵaıyndalǵandyqtan baıqaýǵa qatysqysy kelmegen Býrdýr depýtaty Mehmet Akıf Ersoı keıin Hamdýllah Sýphıdiń ótinishinen soń Tájeddın dergahynda jazǵan jáne Túrik armııasyna arnaǵan óleńimen baıqaýǵa qatysqan.
— Júrgizilgen irikteý nátıjesinde 1921 jyly 12 naýryzda ótken Túrkııa Uly Ulttyq Májilisiniń otyrysynda Mehmet Akıf jazǵan óleń zor qoshemetpen qabyldandy, — dep jazady TRT.
Sondaı-aq osy aptada TRT basylymynda «Erdoǵan BUU Bas hatshysy Antonıý Gýterrıshke «Atatúrik» halyqaralyq beıbitshilik syılyǵyn tabystady» degen taqyryptaǵy aqparat jaryq kórdi.
Atalǵan BAQ-tyń dereginshe, Túrkııa prezıdenti Rejep Taıyp Erdoǵan Ankarada ótken saltanatty rásimde BUU-nyń bas hatshysy Antonıý Gýterrıshke Atatúrik atyndaǵy halyqaralyq beıbitshilik syılyǵyn tabystady.
Erdoǵan beısenbi kúngi rásimde, BUU basshysynyń beıbitshilik pen kópjaqty yntymaqtastyqty damytýǵa qosqan úlesin joǵary baǵalap, Túrkııanyń halyqaralyq uıymdy kúsheıtýge baǵyttalǵan ustanymy ózgermeıtinin atap ótken.
Eýropalyq keńes Taıaý Shyǵys pen Ýkraınadaǵy jaǵdaıdy talqylaý úshin jınalady — Eurasiatoday
Eýropalyq keńes Taıaý Shyǵystaǵy qaqtyǵys pen Ýkraınadaǵy soǵysty talqylaý úshin jınalady.
Eýropalyq keńes prezıdenti Antonıý Koshta Eýropalyq Odaqqa múshe memleketter men úkimet basshylarynyń Taıaý Shyǵys aımaǵy men Ýkraınadaǵy jaǵdaıdy talqylaýy úshin 19 naýryzǵa belgilengen otyrysty ótkizýge bastamashy boldy, dep habarlaıdy Eurasiatoday.
Antonıý Koshta 19 naýryz kúni ótetin Eýropalyq keńes otyrysyna shaqyratynyn aıtqan. Ol basqosýda Irandaǵy jáne Taıaý Shyǵys aımaǵyndaǵy jaǵdaıdy talqylaıtynyn tilge tıek etken.
Sonymen qatar Antonıý Koshta otyrystyń kún tártibinde Ýkraına taqyrybyna, sondaı-aq Lıvan, Gaza sektory jáne Iordan ózeniniń batys jaǵalaýyndaǵy ahýalǵa erekshe kóńil bólinetinin aıtqan.
Aıta ketý kerek, atalǵan keńeske shaqyrylǵandar qatarynda BUU Bas hatshysy Antonıý Gýterrısh, Eýropalyq ortalyq bank basshysy Krıstın Lagard jáne Eýrotop tóraǵasy Kırıakos Perrakakıs bar.
— Sonymen qatar, Halyqaralyq teńiz uıymy aımaqtaǵy shıelenistiń kúsheıýine baılanysty kezekten tys keńes ótkizý týraly sheshim qabyldady. Jıynda basty nazar qaqtyǵystyń keme qatynasynyń qaýipsizdigine tıgizetin áserine aýdarylmaq. Halyqaralyq teńiz uıymynyń otyrysy 18-19 naýryz kúnderi uıymnyń Londondaǵy shtab-páterinde Ispanııa ókili Vıktor Hımenestiń tóraǵalyǵymen ótedi, - dep jazady Eurasiatoday.
Ózbekstan men Qazaqstan sý resýrstaryn tıimdi basqarýǵa kúsh salyp jatyr — ÓzA
Ózbekstan men Qazaqstan arasyndaǵy yntymaqtastyq tek saıası nemese ekonomıkalyq baılanystarmen ǵana shektelmeıdi. Eki eldi tabıǵattyń ortaq syıy — sý da jaqyndastyryp, halyqtardyń ıgiligi jolyndaǵy mańyzdy kópirge aınalyp otyr, dep jazady ÓzA aqparat agenttigi.
Atalǵan BAQ-tyń keltirgen derekterine súıensek, osy baǵyttaǵy ózara túsinistik pen seriktestikti nyǵaıtý maqsatynda Ózbekstan Respýblıkasynyń Sý sharýashylyǵy mınıstrligi basshysy Shavkat Hamroev Qazaqstannyń Ózbekstandaǵy Tótenshe jáne ókiletti elshisi Beıbit Atamqulovpen kezdesý ótkizdi. Kezdesý barysynda eki el arasyndaǵy sý resýrstaryn utymdy paıdalaný men aımaqtyq turaqtylyqty qamtamasyz etý máseleleri keńinen talqylandy.
Taraptar atap ótkendeı, Ózbekstan men Qazaqstan — tarıhy men taǵdyry toǵysqan tatý kórshi memleketter. Eki el arasyndaǵy baılanystar ǵasyrlar boıy qalyptasqan dostyq, ózara qurmet jáne tatý kórshilik qaǵıdattaryna negizdelgen. Búginde Memleket basshylary arasyndaǵy senimdi ári dostyq qatynastardyń arqasynda bul áriptestik jańa sapalyq deńgeıge kóterilip, strategııalyq seriktestik sıpat alyp otyr.
Kezdesý barysynda elshi Beıbit Atamqulov qazirgi álemde sý resýrstary ekonomıkaǵa, energetıkaǵa, ekologııaǵa jáne halyqtyń ál-aýqatyna tikeleı yqpal etetin asa mańyzdy faktorǵa aınalǵanyn atap ótken.
Sondaı-aq osy aptada ÓzA-da «Qysh-qumyra jasaý ónerin jalǵastyryp júrgen qashqadrııalyq jas sheber» degen taqyryptaǵy aqparat jaryq kórgenin aıta ketkimiz keledi.
«ÓzA»-nyń dereginshe, Qashqadarııa oblysynyń Shahrısabz aýdany ejelden qolóner damyǵan óńirlerdiń biri retinde tanylǵan. Bul ólkede qysh jasaý, aǵash pen tasqa naqysh salý, keste tigý sekildi ulttyq óner túrleri urpaqtan-urpaqqa jalǵasyp, ýaqyt synynan súrinbeı ótip keledi.
Ásirese qysh-qumyra jasaý óneri óńir qolóneriniń aıryqsha belgisine aınalǵan.
Osyndaı kóne dástúrdi jalǵastyryp júrgen jas sheberlerdiń biri — Javlon Ǵanıev. Ol qysh ónerin tek kásip emes, áýletten mıras bolyp kele jatqan qasıetti mura dep biledi.
— Javlonnyń atasy óz zamanynda elge tanylǵan sheber qumyrashylardyń biri bolǵan. Búginde sol dástúrdi onyń ákesi Asad Allaev jalǵastyryp kelgen. Bala kúninen ákesiniń sheberhanasynda júrip, sazdyń syryn uǵyp, balshyqtyń minezin tanyp ósken Javlon úshin qysh-qumyra jasaý — jaı ǵana qolóner emes, jan dúnıeni beıneleıtin shyǵarmashylyq álem, - dep jazady ózbekstandyq BAQ.