Ózbekstan men Frantsııa strategııalyq áriptestik deklaratsııasyna qol qoıdy
TAShKENT. KAZINFORM — Ózbekstan prezıdentiniń Frantsııaǵa memlekettik sapary barysynda Shavkat Mırzıeev pen Emmanıýel Makron strategııalyq áriptestik ornatý týraly birlesken deklaratsııaǵa qol qoıdy, dep habarlaıdy Kazinform agenttiginiń menshikti tilshisi.
Sapar aıasynda memleket basshylary shaǵyn quramda kelissóz júrgizip, Ózbekstan men Frantsııa arasyndaǵy qarym-qatynasty jańa deńgeıge shyǵarý múmkindikterin talqylady. Atap aıtqanda, ınnovatsııalyq jáne ónerkásiptik yntymaqtastyqty ilgeriletýge baǵyttalǵan jańa baǵdarlama ázirlendi.
Oǵan saı, sırek mıneral men shıkizatty óndirý, ony óńdeý, energetıka, ınfraqurylymdy damytý úshin birlesken jobalar qolǵa alynady. Bul baǵyttarǵa 12 mlrd eýrodan astam qarajat bólinedi.
Aıta keteıik, byltyr resmı Tashkent pen Parıj arasyndaǵy taýar aınalymy alǵash ret 1 mlrd eýrodan asyp, birlesken kásiporyndar sany 4 ese ósti.
Sonymen qatar, Shavkat Mırzıeev pen Emmanıýel Makron bilim salasyndaǵy baılanystardy nyǵaıtýǵa ýaǵdalasty. Kelisimge sáıkes, bıyl Tashkentte ózbek-frantsýz ýnıversıteti ashylady.
Buǵan qosa, iskerlik, týrıstik jáne mádenı qarym-qatynasty jandandyrý maqsatynda tikeleı áýe reısteriniń sany ulǵaıady.
Kezdesý qorytyndysy boıynsha Ózbekstan men Frantsııa prezıdentteri 10-nan astam qujatqa qol qoıdy.
Eske salaıyq, buǵan deıin Ózbekstan basshysy Shavkat Mırzıeev Frantsııa prezıdenti Emmanıýel Makronnyń shaqyrýymen Parıjge memlekettik saparǵa attanǵanyn jazyp edik.