Ózbekstan men Ázerbaıjan Kaspııde birlesken flot qurýdy josparlap otyr
TAShKENT. KAZINFORM — Ózbekstan Ázerbaıjanmen birlesip Kaspıı teńizinde flot qurýdy josparlap otyr. Bul týraly Report agenttigine suhbat bergen Ózbekstannyń Investıtsııa, ónerkásip jáne saýda mınıstriniń orynbasary Hýrram Teshabaev aıtty, dep habarlaıdy Kazinform agenttiginiń Tashkenttegi menshikti tilshisi.
Ol Baký halyqaralyq teńiz porty búginde ózbek ónimderiniń Orta dáliz arqyly ózge naryqtarǵa shyǵýyn qamtamasyz etetin mańyzdy torap ekenin atap ótti.
— Biz ózbek eksporttaýshylarynyń bul port ınfraqurylymyn tıimdi paıdalanýyn joǵary baǵalaımyz. Sońǵy jyldary osy baǵyt boıynsha júk tasymaly kólemi turaqty ósip, eksporttalatyn ónim túrleri keńeıip, eki eldiń kólik-logıstıkalyq operatorlary arasyndaǵy yntymaqtastyq nyǵaıyp keledi, — dedi mınıstrdiń orynbasary.
Onyń aıtýynsha, Ózbekstan Ázerbaıjanmen birge Orta dálizdiń básekege qabiletin arttyrýǵa baǵyttalǵan jumystardy jalǵastyryp jatyr. Atap aıtqanda, ózbekstandyq taýar eksporttaýshylarǵa qoldaý kórsetiledi. Onyń ishinde júkterdi tıep-túsirý kezinde jeńildikter berý jáne logıstıkalyq rásimderdi ońtaılandyrý sharalary qarastyrylǵan.
— Sonymen qatar kólik ınfraqurylymy men teńiz logıstıkasyn damytýǵa baǵyttalǵan jobalar júzege asyrylyp jatyr. Olardyń qatarynda Kaspıı teńizinde birlesken flot qurý, sondaı-aq «Uztemiryo’lkargo» aktsıonerlik qoǵamy men «Ázerbaıjannyń Kaspıı teńiz keme qatynasy» jabyq aktsıonerlik qoǵamy arasynda birlesken kásiporyn ashý bastamasy bar. Bul jobalar júk tasymalynyń tıimdiligin arttyryp, dálizderdiń turaqtylyǵyn qamtamasyz etýge jáne shyǵyndardy edáýir azaıtýǵa múmkindik beredi, — dedi Hýrram Teshabaev.
Eske salaıyq, Ózbekstan Grýzııadaǵy Anaklııa teńiz portyn salý jobasyna qatysý múmkindigin zerdelep jatyr.
Aıta keteıik, taıaýda «Qytaı — Qazaqstan — Ózbekstan — Aýǵanstan» baǵytynda konteınerlik júk tasymaly jolǵa qoıyldy.
