Ózbekstan men Aýǵanstan arasyndaǵy taýar aınalymy artty
TAShKENT. QazAqparat - Ústimizdegi jyldyń bes aıynda Ózbekstan men Aýǵanstan arasyndaǵy taýar aınalymy 286, 7 mln dollardy qurady, dep habarlaıdy QazAqparattyń menshikti tilshisi.
Taýar aınalymynyń basym bóligi ózbekstandyq taýarlardyń Aýǵanstanǵa eksportynan turady. Taraptar farmatsevtıkalyq, hımııalyq, avtomobıldik jáne toqyma ónimderiniń taýarlaryn ózara jetkizý kólemin ulǵaıtýǵa nıet bildirip otyr.
Mundaı qorytyndylar Ózbekstan men Aýǵanstannyń memlekettik jáne jeke sektorlarynyń ókilderi arasyndaǵy kelissózderdiń alǵashqy kezeńinde jarııalandy. Kezdesý barysynda ekijaqty jáne óńirlik saýda-ekonomıkalyq, ınvestıtsııalyq yntymaqtastyqty, sondaı-aq, kólik jáne tranzıt salasyndaǵy yqpaldastyqty damytýdyń keleshektegi áleýeti talqylandy.
Sondaı-aq, atalmysh shara aıasynda Ózbekstan Respýblıkasynyń syrtqy saýda mınıstri men Ózbekstandaǵy Eýroodaq ókildiginiń basshysy Edýards Stıpraıspen kezdesti.
Eýropalyq tarap yntymaqtastyqty damytýdyń oń yqpalyn eskere otyryp, Ózbekstan men Aýǵanstan arasyndaǵy saýda qatynasynyń qarqyndylyǵyn odan ary arttyrýǵa ázirligin bildirdi.
Ózbekstan Respýblıkasynyń memlekettik statıstıka komıteti bergen málimet boıynsha, 2017 jyly Ózbekstan men Aýǵanstan arasyndaǵy ózara saýda kólemi 617 mıllıonǵa jetken jáne 2016 jylmen salystyrǵanda 18,7% ósken. Aýǵanstan - Ózbekstannyń syrtqy taýar aınalymyndaǵy iri seriktesteriniń biri. Onyń Ózbekstannyń syrtqy taýar aınalymyndaǵy menshikti úlesi - 2,3%. Sondaı-aq, taýar aınalymy qurylymynda Aýǵanstanǵa eksporttalatyn ózbekstandyq taýarlar basym túsip, kólemi 614,9 mıllıon dollardy qurady.
