Ózbekstan men AQSh «Artemıda kelisimderin» jasasty
ASTANA. KAZINFORM – Samarqandta ótken ekijaqty kelissózderden keıin Ózbekstannyń Syrtqy ister mınıstri Bahtıer Saıdov pen AQSh Memlekettik hatshysy Marko Rýbıo «Artemıda kelisimine» qol qoıdy. Bul týraly UzA agenttigi jazdy.
Qujatta Aıdy, Marsty, kometalar men asteroıdtardy beıbit maqsatta zertteý jáne paıdalaný salasyndaǵy halyqaralyq yntymaqtastyq qaǵıdattary belgilengen.
Kelisimge qol qoıý Ózbekstannyń AQSh-tyń Ulttyq aeronavtıka jáne ǵarysh keńistigin zertteý basqarmasymen (NASA), sondaı-aq kelisimge qatysýshy basqa elderdiń ǵarysh agenttikterimen yntymaqtastyǵyn keńeıtýge, ulttyq mamandardy daıarlaýǵa jáne ǵarysh tehnologııalaryn berýge yqpal etýge jańa múmkindikter ashady.
Ózbekstan «Artemıda kelisimine» qol qoıǵan 77-shi memleket boldy.
Bahtıer Saıdov pen Marko Rýbıo Ortalyq Azııa elderi men AQSh arasyndaǵy C5+1 formatyndaǵy mınıstrlik kezdesý aıasynda uıymdastyrylǵan «Ózbekstan men AQSh: ǵasyrlar men qurlyqtardy jalǵaǵan ortaq tarıh» kórmesin de tamashalady.
Aıta keteıik, buǵan deıin AQSh Memlekettik hatshysy Marko Rýbıonyń Ózbekstanǵa barǵanyn jazdyq.
Odan deıin Qazaqstannyń Syrtqy ister mınıstri Muhtar Tileýberdi Samarqandta ótken C5+1 formatyndaǵy mınıstrlik kezdesýge qatysqany habarlanǵan edi. Jıynǵa AQSh Memlekettik hatshysy Marko Rýbıo men Ortalyq Azııa memleketteriniń syrtqy ister vedomstvolarynyń basshylary da qatysty.
