Ózbekstan Marbýrg vırýsyna baılanysty epıdemıologııalyq baqylaýdy kúsheıtti

TAShKENT. KAZINFORM – Ózbekstan Marbýrg vırýsynyń taralýyn aldyn alý maqsatynda epıdemıologııalyq jaǵdaıdy baqylaýdy kúsheıtti, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Eldiń Sanıtarlyq-epıdemıologııalyq salaýattylyq jáne qoǵamdyq densaýlyq komıtetinen málim etkendeı, Ózbekstannyń memlekettik shekara beketterinde ornalasqan sanıtarlyq baqylaý pýnktteri kúsheıtilgen rejımde jumys isteýde.

Kórshiles el Marbýrg indetiniń aldyn alý úshin kelesi sharalardy qoldanyp jatyr:

- Marbýrg qyzbasynyń belgileri baıqalǵan azamattardy arnaıy pýnktterde dereý anyqtaý jáne oqshaýlaý;

- patsıenttermen baılanysta bolatyn medıtsınalyq personal saqtyq sharalaryn qatań saqtap, ınfektsııanyń taralýyn boldyrmaý úshin jeke qorǵanys quraldaryn qoldanady. Sondaı-aq, vırýstyń belgileri baıqalǵan adamdardyń qanyna jáne olardyń denesi tıgen jerlerge jaqyndamaýy kerek;

- qaýipsiz ınektsııa ádisterin qoldaný, jeke qorǵanys quraldaryn durys paıdalaný, birneshe ret qoldanýǵa bolatyn medıtsınalyq quraldardy dezınfektsııalaý jáne qaldyqtardy standartqa saı joıý;

- halyq arasynda aqparattyq jumys júrgizý, vırýsqa qatysty derektermen tanystyrý.

Vedomstvodan atap ótkendeı, qazirgi ýaqytta Marbýrg vırýsyna baılanysty úreılenýge negiz joq.

Qosa ketsek, buǵan deıin QR Densaýlyq saqtaý mınıstrligi Marbýrg indetine baılanysty epıdemıologııalyq baqylaýdy kúsheıtti.