Ózbekstan Maqtaaral stansysyna qatynaıtyn jalǵyz temirjoldy tolyǵymen jaýyp, relsterdi qoparyp almaqshy - Q. Aıtahanov
ASTANA. Maýsymnyń 10-y. QazAqparat /Qanat Mámetqazyuly/ - Ózbekstan Maqtaaral stansysyna qatynaıtyn jalǵyz temirjoldy tolyǵymen jaýyp, relsterdi qoparyp almaqshy. Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Qýanysh Aıtahanov osylaı málim etti.
Esterińizge sala keteıik, buǵan deıin depýtat Q. Aıtahanov elimizdiń ońtústiginde ornalasqan Maqtaaral aýdany barlyq jaǵynan Ózbekstan memleketimen shektesetinin, sondyqtan da aýdan óz elimizben tek Elbasynyń tapsyrmasymen Syrdarııa ózenine salynǵan Dostyq kópiri arqyly ǵana qatysa alatynyn aıtyp másele kótergen bolatyn. Osy saýalda Qazaqstan jáne Ózbekstannyń memlekettik shekaralaryndaǵy ótkizý pýnkteri týraly Qazaqstan jáne Ózbekstan Úkimetteri arasyndaǵy 2001 jyly naýryzdyń 16-syndaǵy kelisimge jáne osy kelisimge sáıkes 2006 jyly qyrkúıektiń 4-inde jasalǵan hattamadaǵy temirjol ótkizý pýnktteri tizbesine jumys istep turǵan Maqtaaral stansysy enbeı qalýyna baılanysty 2009 jylǵy qarashanyń 30-da elimizdiń shekara qyzmetkerleri atalǵan temirjol qatynasyn jaýyp tastaǵany týraly jazylǵan.
«Al, osy stansy arqyly aýdanǵa jyl saıyn júzdegen myń tonna kómir, mıneraldy tyńaıtqyshtar, qurylys materıaldary, janar-jaǵarmaı, azyq-túlik taýarlary jetkizilip, ondaǵan myń tonna maqta talshyǵy, kókónis, baý-baqsha daqyldary syrtqa shyǵarylatynyn eskersek, aýdan úshin temirjol baılanysynyń mańyzdylyǵy túsinikti bolady. Úkimet basshysynyń jaýabynda máseleni sheshý tıisti mınıstrlikterge tapsyrylǵanyn, ol týraly 2010 jyldyń aqpanynda Qazaqstan men Ózbekstannyń úkimetaralyq komıssııasy otyrysynda qaralý josparlanyp otyrǵanyn habarlaǵan bolatynbyz. Alaıda, búgingi tańda atalǵan másele ýshyǵyp Ózbekstan jaǵy Maqtaaral stansysyna keletin temirjoldy tolyǵymen jaýyp, relsterdi qoparyp almaqshy. Bul týraly «Ýzbekıston temır ıýlları» Ulttyq kompanııasynyń basqarma tóraǵasy A. Ramatovtyń 2010 jylǵy 18 mamyrdaǵy «Qazaqstan temir joly» UK AQ perzıdenti A. Mamınge jibergen jedelhatynda aıtylǵyn. Osylaısha, «toqal eshki múıiz suraımyn dep, qulaǵynan aıyryldynyń» kebin kıip otyrmyz», dedi senator.
Depýtattyń sózine qaraǵanda, temirjol qatynasyn toqtatý 300 myń halqy bar Maqtaaral aýdanynyń áleýmettik-ekonomıkalyq damýyna keri áserin tıgizedi, aýdanǵa tasymaldanatyn taýarlardyń baǵasy ósip, halyq qınalatyn bolady. «Sol sebepti, Qurmetti Kárim Qajymqanuly, Ózbekstannan Ońtústik Qazaqstan oblysy Maqtaaral aýdanyna keletin temirjol baılanysyn saqtap qalýdy úkimetaralyq deńgeıde sheship berýińizdi ótinemin», dedi depýtat.
