Ózbekstan Los-Andjeles Olımpıadasynda úzdik ondyqqa enýge nıetti
TAShKENT. KAZINFORM – Ózbekstan quramasy 2028 jyly Los-Anjeleste ótetin jazǵy Olımpıada oıyndarynda komandalyq esepte úzdik ondyqtyń qatarynan kórinýi tıis, dep habarlaıdy Kazinform agenttiginiń menshikti tilshisi.
Sport salasyndaǵy máseleler qaralǵan keńeste Ózbekstan prezıdenti Shavkat Mırzıeev sheneýnikterge osyndaı tapsyrma berdi. Ol úshin jaýapty úkimet múshelerinen bastap, aýdan, aýyl hokımderine deıin jumysty júıeli jolǵa qoıýǵa mindetteldi.
Jınalysta Shavkat Mırzıeev sport federatsııalarynyń tóraǵalary men respýblıkalyq uıym jetekshileriniń jumysyn synǵa aldy. Atap aıtqanda, sheneýnikter men bapkerlerdiń arasynda baılanys joq. Onyń saldary sporttaǵy tómen nátıjelerge ákelip jatyr.
- Ózbekstannyń Olımpıada tarıhy tek jekpe-jek sporty túrlerindegi jetistiktermen jazylyp jatyr. Parıjdegi básekede boks, dzıýdo, thekvondo, aýyr atletıka men erkin kúresten medal enshiledik. Demek qalǵan sport túrlerin damytý kerek. Eldiń ımmıdji men halyqtyń rýhyn kóterýde sporttyń orny aıryqsha, - dedi Ózbekstan basshysy.
Byltyr Parıj Olımpıadasynda Ózbekstan quramasy jalpy esepte 13-orynnan kórindi. Bul rette Sh.Mırzıeev Frantsııadaǵy kórsetkishpen toqmeıilisýge bolmaıtynyn qadap aıtty.
Atalǵan olqylyqtardy joıý úshin ár óńirde Ulttyq Olımpıada komıtetiniń bólimsheleri ashylady. Sonymen qosa, aımaqtardaǵy sportshylardy irikteýdiń tsıfrlyq platformasy qurylady. 4 jyldyqtyń basty básekesine daıyndyqty kúsheıtý maqsatynda qajetti ınfraqurylym jasaqtaýǵa 300 mlrd sým (shamamen $23 mln) bólinedi.
Byltyr olımpıadashylardy marapattaǵan Sh.Mırzıeev Ózbekstan tarıhı jetistikke qol jetkizgenin málimdegen bolatyn.