Ózbekstan latyn álipbıine qatysty kópjyldyq daýǵa núkte qoıdy
ASTANA. KAZINFORM — Ózbekstan prezıdenti Shavkat Mırzıeev latyn grafıkasyna negizdelgen ózbek álipbıin jetildirý týraly zańǵa qol qoıdy. Bul rette azamattarǵa qoldanystaǵy qujattaryn aýystyrýdyń qajeti joq, dep habarlaıdy Kazinform prezıdent ákimshiliginiń basshysy Saıda Mırzıeevaǵa silteme jasap.
Ózbekstan prezıdenti Shavkat Mırzıeev búgin latyn grafıkasyna negizdelgen ózbek álipbıin jetildirý týraly zańǵa qol qoıdy. Bul týraly prezıdent ákimshiliginiń basshysy Saıda Mırzıeeva málimdedi.
Onyń aıtýynsha, álipbıdi jetildirý máselesi kóp jyldan beri pikirtalas týdyryp kelgen. 2023 jylǵy 11 jeltoqsanda jádıdter murasyna arnalǵan konferentsııada ol álipbıdi qaıta qaraý týraly bastama kótergen.
— Aqyry kópjyldyq tarıhı qatelik túzetildi. Búgin prezıdentimiz latyn grafıkasyna negizdelgen ózbek álipbıin jetildirý týraly zańǵa qol qoıdy, — dep jazdy Saıda Mırzıeeva.
Ol ózgerister jazý júıesindegi kemshilikterdi joıýǵa jáne ózbek tiliniń tsıfrlyq keńistiktegi ornyn nyǵaıtýǵa baǵyttalǵanyn aıtty.
Sonymen qatar zańnyń qabyldanýy qujattardy jappaı aýystyrýdy talap etpeıdi.
— Biz shyǵyndy barynsha azaıtýdy tańdadyq. Qoldanystaǵy barlyq qujat, ulttyq valıýta men baǵaly qaǵazdar óz kúshin saqtaıdy. Al oqýlyqtar, mańdaıshalar men jol kórsetkishteri paıdalaný merzimi aıaqtalǵan saıyn kezeń-kezeńimen aýystyrylady, — dep túsindirdi prezıdent ákimshiliginiń basshysy.
Saıda Mırzıeeva zańnyń dál 21 qazanda qabyldanýynyń sımvoldyq máni bar ekenin de atap ótti. Bul kúni elde Ózbek tili kúni atalyp ótedi.
Onyń pikirinshe, jetildirilgen álipbı jastardyń saýattylyǵyn arttyrýǵa jáne ózbek tiliniń bedelin nyǵaıtýǵa yqpal etedi.
Eske salaıyq, buǵan deıin Ózbekstandaǵy mektep oqýlyqtary jańartylǵan ózbek álipbıine 2027-2031 jyldar aralyǵynda kezeń-kezeńimen kóshiriletinin jazǵanbyz.
