Ózbekstan qurylys salasyndaǵy kelisimsharttardy tsıfrlandyrady

TAShKENT. KAZINFORM – Jaýapty vedomstvo basshylarymen ótken keńeste Ózbekstan prezıdenti Shavkat Mırzıeev qurylys salasyndaǵy sybaılas jemqorlyqty joıýǵa baǵyttalǵan sharalardy atady, dep habarlaıdy Kazinform agenttiginiń Tashkenttegi menshikti tilshisi Álıhan Asqar. 

Ózbekstan basshysynyń baspasóz hatshysy Sherzod Asadov málim etkendeı, jemqorlyqpen kúresý úshin 1 shildeden bastap qurylystaǵy barlyq kelisimsharttar tsıfrly formatqa kóshiriledi.

Sondaı-aq, merdiger uıym oryndaıtyn jumystar salyq organyna usynylatyn elektrondyq shot-faktýra negizinde ǵana qarjylandyrylady. 

Buǵan qosa, Shavkat Mırzıeev nysandy qabyldap alý protsesi de tsıfrlandyrylyp, qujattar «Shaffof kýrılısh» (Taza qurylys) júıesi arqyly rastalýy tıis ekenin atap ótti.

Al óndirýshi, qurylys júrgizetin kompanııa men onyń barysyn qadaǵalaıtyn organǵa onlaın rejımde materıaldardyń qunyn bilip otyratyn júıe jasaqtalady.

Sonymen qatar jobalaý salasynda tártip ornatý maqsatynda Qurylys mınıstrliginiń quramynan jobalyq keńse qurylady.

«Budan bylaı jobalyq keńseniń usynysy bolmaǵan jobalyq qujattar memlekettik saraptamaǵa qabyldanbaıdy», — dep málim etti Ózbekstan prezıdenti.

Shavkat Mırzıeev Bas prokýratýraǵa qurylys materıaldaryn óndirýden bastap daıyn ónimdi tutynýshyǵa jetkizetin tizbekte kóleńkeli ekonomıka bolmaıtyndaı júıe qurýdy tapsyrdy.

Eske salaıyq, buǵan deıin Ózbekstan prezıdenti saladaǵy olqylyqtar saldarynan qurylysta 50 trln sým ($4 mlrd) kóleńkede qalyp otyrǵanyn málimdegen bolatyn.