Ózbekstan koronavırýs juqtyrǵan týrıstke 3 myń dollar tólemek

NUR-SULTAN. QazAqparat - Ózbekstan koronavırýs pandemııasynyń saldarynan turalap qalǵan týrızm salasyn jandandyrýdyń amalyn qarastyryp jatyr. El prezıdenti 19 maýsymda tıisti qaýlyǵa qol qoıdy. Bul týraly «Ózbekstan 24» telearnasynyń arnaıy habarynda aıtyldy, dep habarlaıdy QazAqparat.

«Sanıtarlyq-epıdemıologııalyq qaýipsizdik rejıminiń kúsheıtilgen talaptaryn qatań saqtaı otyryp, týrızm salasyn damytýdyń qosymsha sharalary týraly» dep atalatyn qaýly arqyly elde «Uzbekistan. Safe travel guaranteed» (Ózbekstan. Qaýipsiz saıahattaýǵa kepildik) júıesi engiziledi.

Osy júıeniń aıasynda Qaýipsiz týrızm qory qurylýda. Oǵan Daǵdarysqa qarsy qordan 20 mlrd sým bólinedi, sondaı-aq sertıfıkattaý jarnalaryna tólenetin tólemder arqyly qarjy quıylady.

Innovatsııalyq densaýlyq saqtaý ulttyq palatasynyń tóraǵasy Ravshan Izamov «Ózbekstan 24» arnasynyń tilshisine bergen suhbatynda jergilikti jáne sheteldik týrıster Ózbekstanǵa saıahattaýdyń qaýipsiz ekenine senimdi bolýy kerek ekenin tilge tıek etti.

«Eger sheteldik týrıst koronavırýstyq ınfektsııany juqtyrsa, oǵan 3000 dollar ótemaqy tólenedi. Bul tájirıbe álemniń kóptegen elderinde keńinen qoldanylady. Týroperatorlar karantın kezeńinde sheteldik týrısterge tek «Uzbekistan. Safe travel guaranteed» júıesiniń tizilimine engizilgen nysandarda ǵana qyzmet kórsete alady», - dep habarlady «Ózbekstan 24» tilshisi arnaıy habarda.

Foto: gazeta.uz