Ózbekstan kóp áıel alýdy nasıhattaǵandardy jazalaýǵa kóshti

Ózbekstan prezıdenti Shavkat Mırzıeev memlekettiń zaıyrlylyǵyn aıqyndaıtyn Qylmystyq kodeks pen Ákimshilik jaýapkershilik týraly kodekske engizilgen túzetýlerdi bekitetin zańǵa qol qoıdy, dep habarlaıdy Kazinform agenttiginiń menshikti tilshisi.

Ádilet mınıstrliginiń málimetine saı, zańnamaǵa engizilgen túzetýler kóp áıel alýdy nasıhattaý, AHAJ-da resmı neke qımaı «nıkoh» rásimin jasaý, genderlik kemsitý, sondaı-aq qoǵamdyq orynda jeke basyn anyqtaýǵa múmkindik bolmaıtyndaı dárejede jabyq kıim kıgenderge qoldanylatyn jaýapkershilikterdi qamtıdy.

«Eki jáne odan da kóp áıelmen birge turýdy nasıhattaý, osy turǵyda ıdeıa nemese úndeý taratý, sondaı-aq mundaı áreketterdi qoldaý 15-ten 30 bazalyq eseptik shamaǵa (BESh) deıin nemese 4,950 mıllıonnan 9,9 mln somaǵa deıin mólsherde aıyppul salý nemese 15 táýlikke deıin ákimshilik qamaýǵa alýmen jazalanady», - delingen Ózbekstan Ádilet mınıstrliginiń málimetinde.

Nekesi zańdy tirkelmegen adamdar arasynda, onyń ishinde neke jasyna tolmaǵandarmen otbasyn qurý boıynsha dinı rásim jasaǵandarǵa 15-ten 30 bazalyq eseptik shamaǵa deıin aıyppul salynady.

Genderlik kemsitýdi nasıhattaý, áıelder men erlerdiń teń quqyǵyn ashyq túrde joqqa shyǵarý, osy baǵyttaǵy ıdeıalar men úndeýlerdi taratý 10-nan 20 BESh-ke deıin nemese 3,3-6,6 mıllıon sým aıyppulmen jazalanady.

Budan basqa, jeke basyn anyqtaýǵa múmkindik bermeıtindeı búrkenip kıingen adamdardyń qoǵamdyq oryndarda bolǵany úshin jaza engizilip otyr. Osyndaı áreket úshin 3,3 - 4,95 mln sým aralyǵynda aıyppul taǵaıyndalady.

Vedomstvodan atap ótkendeı, tıisti ózgerister zań resmı jarııalanǵan kúninen bastap kúshine enedi.