Ózbekstan kóleńkeli ekonomıkanyń ishki jalpy ónimdegi úlesin 29%-ǵa deıin tómendetýge nıetti

TAShKENT. KAZINFORM – Ózbekstan prezıdenti Shavkat Mırzıeevtiń tóraǵalyǵymen ótken keńeste el ekonomıkasynyń kóleńkede qalyp otyrǵan qarajatyn statıstıka organdary tarapynan tolyq baqylaýǵa alý máseleleri qaraldy, dep habarlaıdy Kazinform agenttiginiń menshikti tilshisi.

- Kóleńkeli ekonomıkanyń úlesi 2017 jylǵy 50 paıyzdan 2024 jyly 35 paıyzǵa deıin qysqardy. Taıaý bolashaqta taǵy 79 trln sýmdy statıstıka organdarymen baqylaýǵa alý josparlanyp otyr. Tıisinshe, kóleńkeli ekonomıkanyń ishki japy ónimdegi úlesi 29 paıyzǵa deıin tómendeıdi, - delingen Ózbekstan prezıdentiniń baspasóz qyzmeti taratqan habarlamada.

Byltyr Ózbekstannyń ishki jalpy ónimi 115 mlrd dollarǵa baǵalanǵan edi. Alaıda, Ulttyq statıstıka komıteti qyzmet kórsetý, qurylys, aýyl sharýashylyǵy, ónerkásip salalaryna qosymsha esep júrgize otyryp, qamtylmaı qalǵan 81 trln sýmdy anyqtady. Osylaısha, byltyr kórshiles eldiń ekonomıkasy 115 mlrd dollardan 121,4 mlrd dollarǵa deıin ósti.

Eske salaıyq, buǵan deıin Ózbekstan ekonomıkasynyń 8,3 mlrd dollardan asa qarajaty kóleńkede qalyp otyrǵanyn jazyp edik. Osylaısha, ol ishki jalpy óniminiń 33,3 paıyzyna teńelip otyr.

Sonymen qosa, 2023 jyly kóleńkeli ekonomıkadan Ózbekstannyń memlekettik bıýdjetine $2,4 mlrd zalal keldi.

Byltyr Ózbekstannyń Ekonomıka jáne qarjy mınıstri Djamshıd Kýchkarov eldegi kóleńkeli ekonomıkanyń kólemi jalpy ishki ónimniń 25-ten 45 paıyzyna deıingi aralyqta ekenin málimdep edi.