Ózbekstan Qytaıdan 38 júk jáne jolaýshy elektrovozy, teplovoz jáne manevrlik lokomotıvterdi satyp alady

TAShKENT. KAZINFORM – Tehnıkalar 2034 jylǵa deıin jetkiziledi. Bul «Ózbekstan temir joldary» AQ men Qytaıdyń «CRRC Zhuzhou Locomotive» kompanııasy arasynda jasalǵan kelisim-shartta aıqyndaldy. Bul týraly Ózbekstan Respýblıkasy Kólik mınıstrliginiń baspasóz qyzmeti habarlady.

15 tamyzynda Ózbekstan kólik mınıstri Qytaıdyń «CRRC Zhuzhou Locomotive» kompanııasynyń prezıdenti Van Sıaolın bastaǵan delegatsııa ókilderimen kezdesti.

Kezdesýde Ózbekstanǵa júk jáne jolaýshylar poıyzdary men qosalqy bólshekterin satyp alý jáne jetkizý máseleleri talqylandy.

Talqylaý sońynda Ózbekstan men Qytaı kompanııalary arasynda lokomotıv parkin jańǵyrtý jáne jańartý týraly kelisimge qol qoıyldy. Bul kelisim-shart Sh.Mırzıeevtiń Qytaı Halyq Respýblıkasyna joǵary deńgeıdegi sapary barysynda memleket basshylary arasyndaǵy kelisimderge sáıkes jasalǵany atap ótildi.

Kelisimge sáıkes, qytaılyq kompanııa kórshi eldiń temir joldarynda qoldanylatyn «Ózbekstan» serııaly 12 elektrovozyn jańǵyrtý, sondaı-aq 2034 jylǵa deıin bólip tóleý shartymen 38 júk jáne jolaýshy elektrovozdaryn, teplovoz jáne manevrlik lokomotıvterdi jetkizip beredi.

Aıta keteıik, buǵan deıin Ózbekstan Koreıadan 6 júrdek elektr poıyzyn satyp alatynyn habarlaǵan edik.