Ózbekstan Qyrǵyzstan kómir eksportynyń 97 paıyzdan astamyn satyp aldy

TAShKENT. Kazinform — Ózbekstan 2025 jyldyń basynan beri Qyrǵyzstannan kómir ımportyn 52,4%-ǵa arttyrdy, dep habarlaıdy Upl.uz saıty Qyrǵyzstannyń Ulttyq statıstıkalyq komıtetiniń málimetterine silteme jasap. 

Qańtar-aqpan aılarynda Ózbekstan Qyrǵyzstannan 186,8 myń tonna kómir satyp aldy, bul ótken jyldyń sáıkes kezeńimen salystyrǵanda aıtarlyqtaı kóp. Soma boıynsha ımport kólemi 12,4 mln dollarǵa (+12,6%) jetti.

Ózbekstan jalpy eksporttyń 97 paıyzdan astamyn satyp alyp, Qyrǵyzstannyń negizgi kómir satyp alýshylarynyń birine aınaldy.

Degenmen, kómirdiń barlyq túrine suranys birdeı emes: lıgnıt (qońyr kómir) ımporty eki ese azaıyp, 51,3 myń tonnadan aspady. Osylaısha, Ózbekstan ónerkásiptik jáne energetıkalyq qajettilikter úshin tıimdirek kómirge nazar aýdaryp otyr.

2024 jyldyń qarashasynda Qyrǵyzstan EAEO aýmaǵynan tys jerlerge kómirdi avtomobılmen eksporttaýdy shektedi. Alaıda Ózbekstanmen saýda qatynasy temirjol arqyly bolǵandyqtan, jetkizilim turaqty boldy.

Sonymen birge Ózbekstan 2030 jylǵa qaraı otandyq kómir óndirýdi 20 paıyzǵa arttyrýdy josparlaýda.

Eske sala keteıik, Qyrǵyzstan Ózbekstanmen baılanystyratyn jańa joldar salýdy josparlap otyr.