Ózbekstan kıbersportty resmı sport túri dep tanydy
TAShKENT. QazAqparat – Ózbekstan kıbersportty resmı sport túri dep tanydy. Ózbekstan Prezıdenti «Kıbersport túrlerin odan ári damytý jáne keńinen tanymal etý boıynsha qosymsha sharalar týraly» tıisti qaýlyny qabyldady, dep habarlaıdy QazAqparat tilshisi Uza.uz saıtyna silteme jasap.
Kıbersportty damytýdyń negizgi baǵyttarynyń biri - kıbersport boıynsha respýblıkalyq týrnırlerdi uıymdastyrý, sondaı-aq bedeldi halyqaralyq jarystarǵa qatysý.
Osy maqsatta 2023 jyldan bastap jyl saıyn «Ózbekstan Respýblıkasy Mınıstrler Kabınetiniń Kýbogy», «Jastar kýbogy» týrnırleri jáne «Uzbekistan Esports Championship» Ózbekstan chempıonaty ótkiziledi.
Kásibı kıbersportshylar men jattyqtyrýshylardy, bilikti tóreshiler men kommentatorlardy daıarlaýǵa erekshe nazar aýdarylatyn bolady. Ol úshin Ózbek memlekettik dene shynyqtyrý jáne sport ýnıversıtetinde 2023/2024 oqý jylynan bastap «Sporttyq qyzmet: kıbersport» bakalavrıatynyń bilim berý baǵyty ashylady.
Sportty damytý, aqparattyq tehnologııalar men kommýnıkatsııalardy damytý mınıstrlikterine, sondaı-aq Jastar isi jónindegi agenttikke sporttyń osy túrin damytý úshin jaýapkershilik júkteldi.
Kıbersport - kóptegen elderde tanymal bola bastaǵan álemde belsendi damyp kele jatqan sala. Halyqaralyq Olımpıada komıteti 2017 jyldan kıbersportty olımpıadalyq sport túri retinde taný máselesin qaraýda. Qazaqstanda kıbersport 2018 jyly resmı sport túri bolyp tanyldy.
